Ղազախստանում ուժեղացրել են Կասպից ծովի ղազախական հատվածում գտնվող նավթագազային օբյեկտների հակաահաբեկչական պաշտպանության պահանջները: Էներգետիկայի նախարարի 2026 թվականի օգոստոսի 6-ի հրամանի համաձայն՝ Կասպից ծովում ընդերքօգտագործման գործառնություններ իրականացնող ընկերությունները ահաբեկչության դեմ պայքարի ծովային օպերատիվ շտաբի պահանջով պետք է արտադրական օբյեկտների հարևանությամբ ապահովեն դրա ուժերի և միջոցների տեղակայման վայրեր, ինչպես նաև կրեն դրա հետ կապված ծախսերը, հայտնում է Zakon.kz-ը:
Շտաբի ուժերն ու միջոցները թույլատրվում է տեղակայել նաև շարժական ծովային օբյեկտների վրա:
Տեղակայման վայրը պետք է համապատասխանի սահմանված պահանջներին․ այնտեղ պետք է նախատեսված լինեն առնվազն 10 աշխատակցի տեղավորման համար պայմաններ, ուղղաթիռային հրապարակ, իսկ հեռավորությունը ծովային արտադրական օբյեկտներից չպետք է գերազանցի 23 կիլոմետրը:
Ծախսերին են վերաբերում ծովային օպերատիվ շտաբի ուժերի և միջոցների տեղակայման ու գործունեության ապահովման փաստաթղթավորված ծախսերը: Դրանց ցանկը, ծավալը և փոխհատուցման կարգը կողմերը կորոշեն փոխադարձ համաձայնությամբ՝ Ղազախստանի քաղաքացիական օրենսդրությանը համապատասխան:
Փոփոխությունները կատարվել են Ղազախստանի էներգետիկայի նախարարության ենթակայության տակ գտնվող՝ ահաբեկչական առումով խոցելի նավթագազային ոլորտի օբյեկտների հակաահաբեկչական պաշտպանության կազմակերպման հրահանգում:
Հրամանն ուժի մեջ կմտնի 2026 թվականի հոկտեմբերի 17-ին: