Իսրայելի նախկին վարչապետ Էհուդ Բարաքը հայտարարել է, որ գործող կառավարության ղեկավար Բենիամին Նեթանյահուն «լիովին դուրս է եկել ռելսերից»՝ կոշտ քննադատության ենթարկելով նրա քաղաքականությունը Սիրիայում ռազմական իրադարձությունների ֆոնին Թուրքիայի հետ հարաբերությունները սրելու հարցում։
X հարթակի հրապարակման մեջ Բարաքը նշել է, որ չի կարող բացահայտել տեղի ունեցողի բոլոր մանրամասները, սակայն Նեթանյահուի կողմից Թուրքիայի հետ դիմակայությունում իրականացվող «կանխամտածված» սրացումն անվանել է «անխոհեմ և հիմար քայլ»։ Նրա խոսքով՝ դժվար է որոշել, թե այս երկու բնորոշումներից որն է ավելի շատ համապատասխանում վարչապետին։
Նախկին վարչապետի կարծիքով՝ սրացումը կարող է կապված լինել Նեթանյահուի քաղաքական ձգտման հետ՝ ձգել մինչև ընտրությունները, անվտանգության մի շարք խնդիրների ֆոնին, որոնք իսրայելական հասարակությունում անհանգստություն և վախ են առաջացնում։
«Թուրքիան ո՛չ Իրանն է, ո՛չ էլ Ասադի Սիրիան», — ընդգծել է Բարաքը։ Նա նշել է, որ Անկարայի հետ հարաբերություններում չկա այնպիսի ռազմավարական խնդիր, որը հնարավոր չլինի լուծել, տեղայնացնել կամ երկար ժամանակով հետաձգել գաղտնի շփումների և ԱՄՆ-ի հետ համակարգման միջոցով՝ օգտագործելով Վաշինգտոնի ազդեցությունը Թուրքիայում և Սիրիայում։
Բարաքը մեղադրել է Նեթանյահուին, որ նա «լիովին դուրս է եկել ռելսերից»։ Նրա խոսքով՝ պատերազմի հայտարարված նպատակներին հասնելու «բացարձակ ձախողումից» հետո և մոտ երկու ամիս անց սպասվող «քաղաքական պարտության» ֆոնին վարչապետն արդեն զբաղված է ոչ թե Իսրայելի անվտանգության ապահովմամբ, այլ քաղաքական գոյատևմամբ՝ գործելով որպես «մոլագար խաղամոլ»։
Իսրայելում խորհրդարանական ընտրությունները նախատեսված են հոկտեմբերի 27-ին։ Սրանք կլինեն առաջին ընտրությունները 2023 թվականի հոկտեմբերի 7-ի իրադարձություններից և դրանց հաջորդած պատերազմներից ու տարածաշրջանային բախումներից հետո։
Բարաքը նախազգուշացրել է, որ Նեթանյահուի «անխոհեմ» վարքագիծը լուրջ մտահոգություն է առաջացնում Իսրայելի դաշնակիցների և տարածաշրջանի ու աշխարհի նրա բարեկամ երկրների շրջանում։ Միևնույն ժամանակ, նա վստահություն է հայտնել, որ Նեթանյահուի իրավահաջորդներն ավելի լավ կկարողանան պատասխանատվություն կրել երկրի անվտանգության համար։
Նախկին վարչապետը կոչ է արել իրավիճակի ցանկացած «արմատական լուծում» հետաձգել մինչև ընտրությունների ավարտը։ Նրա խոսքով՝ վնասի վերականգնումը, որը, նրա պնդմամբ, Նեթանյահուն հասցրել է Իսրայելին վերջին երեք տարիների ընթացքում՝ թե՛ անվտանգության ոլորտում, թե՛ քաղաքական մակարդակով, երկար ժամանակ կպահանջի։