«Հայաքվե» ընդդիմադիր նախաձեռնության համակարգող Ավետիք Չալաբյանի նկատմամբ քրեական հետապնդումը բացառապես քաղաքական բնույթ է կրում և վկայում է Հայաստանում լայնածավալ բռնաճնշումների մասին։ Այս մասին լրագրողների հետ զրույցում «Հայաքվե» ակցիայի ընթացքում օգոստոսի 21-ին դատարանի շենքի մոտ հայտնել է «Բարգավաճ Հայաստան» կուսակցության քաղխորհրդի անդամ Արման Աբովյանը։
Նրա խոսքով՝ տեղի ունեցող գործընթացներն ակնհայտորեն ցույց են տալիս իշխանությունների վերաբերմունքն ընդդիմության նկատմամբ։ «Ավետիք Չալաբյանի դեպքը շատ բացահայտ ցույց է տալիս, թե այսօր ինչ է տեղի ունենում Հայաստանում։ Մենք ապրում ենք մի իրականությունում, երբ միայն սեփական կարծիքն արտահայտելու և հայրենիքը սիրելու համար հորինում են շինծու պատճառներ և մարդկանց կալանավորում», – հայտարարել է Աբովյանը։
Քաղաքական գործիչը նաև զուգահեռներ է անցկացրել այլ հասարակական և քաղաքական գործիչների նկատմամբ հարուցված քրեական գործերի հետ։ «Նույն շարքում է նաև Գագիկ Ծառուկյանի գործը, որը նույնպես քաղաքական բանտարկյալ էր։ Ինչ էլ պնդեն իշխանության ներկայացուցիչները, Ծառուկյանի գործը դասական ուսուցողական օրինակ է, թե ինչպես են հետապնդում հայ գործչին», – ընդգծել է «Բարգավաճ Հայաստանի» ներկայացուցիչը։
Հիշեցնենք, որ Ավետիք Չալաբյանը կալանավորվել է հունիսի 24-ին ՝ Հայաստանի քաղաքացիների՝ ընտրությունների ժամանակ ազատ կամարտահայտմանը խոչընդոտելու փորձի մեղադրանքով։ Ավելի վաղ՝ ապրիլի վերջին, «Հայաքվե» նախաձեռնությունը միացել էր Սամվել Կարապետյանի «Ուժեղ Հայաստան» դաշինքին՝ գործող իշխանությունը փոխելու համար ջանքերը միավորելու նպատակով։