ԱՄՆ նախագահ Դոնալդ Թրամփը կարծում է, որ Իրանի հետ գործարքի կնքումը բարդացել է այդ երկրի ռազմական ներուժի թուլացման և նրա ղեկավար կազմի մեծ մասի սպանության պատճառով:
«Ռազմածովային ուժերն այլևս չկան, ռազմաօդային ուժերը չկան, ղեկավարություն չկա, շատ առաջնորդներ այլևս չկան: Գործարք կնքելը հեշտ չէ։ Ոչ ոք չգիտի, թե ով է նրանց ղեկավարը»,- ասել է Թրամփը։
Ամերիկացի առաջնորդը հերթական անգամ ընդգծել է, որ Իրանի հետ հակամարտության հիմնական նպատակն է Թեհրանին թույլ չտալ միջուկային զենք ստանալ:
Նրա խոսքով ՝ Թեհրանն ընդամենը մի քանի շաբաթ էր հեռու միջուկային ռումբի ստեղծումից, երբ 2025 թվականին հրաման տվեց հարվածներ հասցնել իրանական միջուկային օբյեկտներին:
Թրամփը հավելել է, որ եթե չլիներ ԱՄՆ միջամտությունը, Իրանը «երկրի երեսից կջնջեր» Իսրայելն ու ամբողջ Մերձավոր Արևելքը:
«Նրանք խելագար են։ Նրանք առանց վարանելու միջուկային զենք կկիրառեին»,- եզրափակել է նա։