ԱՄՆ նախագահ Դոնալդ Թրամփը շնորհակալություն է հայտնել Սպիտակ տան մամուլի քարտուղար Քարոլայն Լիվիթին, որն օգոստոսի վերջին կլքի իր պաշտոնը, և հայտարարել է, որ նա կշարունակի աշխատել իր թիմի համար արդեն Սպիտակ տնից դուրս, հայտնում է NBC News-ը։
Միրթլ Բիչում կայացած հանրահավաքի ժամանակ Թրամփը Լիվիթին հրավիրել է բեմ և շնորհակալություն հայտնել նրա աշխատանքի համար։
«Ես նաև ուզում եմ մեր երախտագիտությունը հայտնել հրաշալի մի կնոջ, ով այսօր այստեղ է և անհավանական աշխատանք է կատարել»,— ասել է նախագահը։
Այնուհետև Թրամփը կատակել է, որ Լիվիթը վերջերս երկրորդ անգամ մայր է դարձել։
«Նա հենց նոր երեխա է ունեցել, և ես նոր եմ իմացել, որ նա երեխային ավելի շատ է սիրում, քան Դոնալդ Թրամփին, և ես շատ զայրացած եմ»,— ասել է նա՝ առաջացնելով հանդիսատեսի ծիծաղը։
Երբ Լիվիթը բարձրացել է բեմ, Թրամփը հավելել է. «Դուք նրա մասին վերջին անգամ չեք լսում։ Նա մեզ համար կաշխատի դրսից, բայց պատրաստվում է մի քիչ ժամանակ անցկացնել այս երկու հրաշալի երեխաների հետ, այնպես չէ՞»
Լիվիթը, իր հերթին, շնորհակալություն է հայտնել նախագահին և Սպիտակ տան մամուլի քարտուղարի պաշտոնում աշխատանքն անվանել «իր ողջ կյանքի պատիվը»։
«Ինձ համար ողջ կյանքի պատիվ էր լինել ձեր Սպիտակ տան մամուլի քարտուղարը»,— ասել է նա։
Լիվիթը իր հեռանալու մասին հայտարարել էր օգոստոսի 12-ին։ Նա որոշումը բացատրել էր ընտանիքի հետ ավելի շատ ժամանակ անցկացնելու ցանկությամբ։ Մայիսին մամուլի քարտուղարի երկրորդ երեխան էր ծնվել։
Միևնույն ժամանակ Լիվիթը մտադիր չէ ամբողջությամբ հեռանալ Թրամփի քաղաքական թիմից։ Ավելի վաղ ուրբաթ օրը նա Air Force One ինքնաթիռում լրագրողներին հայտնել էր, որ Սպիտակ տնից հեռանալուց հետո կվերադառնա աշխատանքի MAGA Inc.-ում՝ Թրամփի հետ կապված քաղաքական գործողությունների սուպերկոմիտեում (Super PAC)։
Այսպիսով, Լիվիթը կլքի Սպիտակ տան պաշտոնական ներկայացուցչի պաշտոնը, սակայն կշարունակի աշխատել նախագահի քաղաքական թիմում՝ աշխատանքը համատեղելով երկու փոքր երեխաների խնամքի հետ։