Ուժեղ ամպրոպներ և հորդառատ անձրևներ են պատուհասել Լեհաստանի բազմաթիվ շրջաններ։ Կեսգիշերից սկսած հրշեջներն ավելի քան 4 հազար անգամ մեկնել են կանչերի՝ կապված տապալված ծառերի, վնասված տանիքների և ջրածածկումների հետ, հաղորդում է Euronews-ը։
Անբարենպաստ եղանակի պատճառով, որպես նախազգուշական միջոց, տարհանվել է 12 մանկական զբոսաշրջային ճամբար։ Դրանց մասնակիցներն ու աշխատակիցները տեղավորվել են կապիտալ շենքերում։ Պետական հրշեջ ծառայության տվյալներով, ճամբարներում տուժածների մասին հաղորդումներ չեն ստացվել։
Ջրածածկումների հետ կապված ամենաբարդ իրավիճակը ստեղծվել է Կույավիա-Պոմորիեի վոյեվոդությունում։ Լոձի վոյեվոդությունում փրկարարները հիմնականում վերացնում էին ուժեղ քամու հետևանքները՝ հեռացնում էին ընկած ծառերն ու ճյուղերը։ Մեծ Լեհաստանի և Վարմիա-Մազուրիայի վոյեվոդություններում նույնպես հաղորդվել է ճանապարհների, տների և նկուղների տեղային ողողումների մասին։
Անբարենպաստ եղանակը հանգեցրել է նաև էլեկտրամատակարարման խափանումների։ Մոտ 19,4 հազար տնային տնտեսություն մնացել է առանց էլեկտրականության։ Ամենաշատ անջատումները գրանցվել են Տոմաշուվ-Մազովեցկու, Զգեժի և Պյոտրկուվ-Տրիբունալսկու շրջաններում։
Գիշերվա ընթացքում տեղացել է մինչև 90 մմ տեղումներ։ Օլշտինի մոտ գտնվող Լինա գետում ջրի մակարդակը 5 սմ-ով գերազանցել է նախազգուշական շեմը։ Բարտագի շրջանում ջուրը դուրս է եկել պաշտպանական կառույցների սահմաններից և հեղեղել հարակից տարածքները։ Իշխանությունները հայտնում են, որ իրավիճակը աստիճանաբար կայունանում է, ջրի մակարդակը նվազում է։
Ուժեղ քամու պատճառով մինչև հետագա ծանուցում փակվել են Վիլյանուվի պալատի թանգարանի այգիները, Լազենկի պարկը և Վարշավայի կենդանաբանական այգին։ Կամպինոսի ազգային պարկը կոչ է արել բնակիչներին և զբոսաշրջիկներին զգույշ լինել և քամու պոռթկումների ժամանակ չկանգնել ծառերի տակ։
Լեհաստանի տարածքային պաշտպանության ուժերը բերվել են բարձր պատրաստվածության ռեժիմի՝ արտակարգ ծառայություններին և տեղական իշխանություններին աջակցելու համար։