Մոսկվան Մեծամորի ատոմային էլեկտրակայանի անվտանգության վերաբերյալ տարածվող տեղեկությունները գնահատում է որպես հայ-ռուսական էներգետիկ համագործակցությունը խաթարելու փորձ։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, փոխանցում է «Լենտա.ռու»-ն։
Զախարովայի խոսքով՝ նման հրապարակումների նպատակը կարող է լինել Ռուսաստանի մասնակցությամբ ծրագրերին խոչընդոտելը և Հայաստանում արևմտյան նախագծերի ու տեխնոլոգիաների առաջմղումը։ Նա նշել է, որ ներկայում հայ և ռուս մասնագետներն աշխատում են ԱԷԿ-ի շահագործման ժամկետը մինչև 2036 թվականը երկարաձգելու ուղղությամբ։
Մեծամորի ԱԷԿ-ը Հարավային Կովկասում գործող միակ ատոմակայանն է և ապահովում է Հայաստանի էլեկտրաէներգիայի շուրջ 30 տոկոսը։ Կայանի արդիականացման և շահագործման ժամկետի երկարաձգման աշխատանքներին մասնակցում է «Ռոսատոմը»։