Ուկրաինայի նախագահ Վլադիմիր Զելենսկին հայտարարել է, որ խուզարկությունների անցկացման պահին առկա տվյալները բավարար էին երկրի նախագահի գրասենյակի ղեկավարի տեղակալ Իրինա Մուդրայային պաշտոնանկ անելու համար, հայտնում է РБК-Украина-ն։
Ըստ Զելենսկիի, ինքը պաշտոնանկության որոշումը կայացրել է անմիջապես այն բանից հետո, երբ հայտնի է դարձել քննչական գործողությունների իրականացման մասին։
«Այն, ինչ ես գիտեմ, բավարար էր արձագանքելու հենց այս գործի առաջին օրը՝ անմիջապես խուզարկություններից հետո։ Բավարար մանրամասներ կային նրան աշխատանքից ազատելու համար», — ասել է նախագահը լրագրողների հետ հանդիպմանը։
Նա նշել է, որ լսել է տեղեկատվություն հնարավոր խախտումների կամ գործի ֆիգուրանտների կողմից կատարված որոշ գործողությունների մասին, սակայն վաղաժամ է համարում մանրամասները քննարկել մինչև նոր տվյալների ի հայտ գալը։
«Այն, ինչ այնտեղ հնչեցվել էր, ես բավարար եմ համարում, որպեսզի պաշտոնանկ արվեն տեղակալը և վարչության ևս մեկ աշխատակից։ Լրացուցիչ տեղեկատվություն կլինի՝ կարձագանքենք լրացուցիչ տեղեկատվությանը», — հայտարարել է Զելենսկին։
Նախագահը նաև ընդգծել է, որ կադրային փոփոխությունները չպետք է իրականացվեն պարզապես փոփոխությունների համար։ Ըստ նրա, պաշտոնյաներին պետք է փոխել այն ժամանակ, երբ դրա համար հիմքեր կան։
Զելենսկին հայտարարել է, որ իրավապահ և հակակոռուպցիոն մարմինները պետք է աշխատեն անկախ, իսկ իշխանությունները՝ արձագանքեն նրանց աշխատանքի արդյունքներին։ Միևնույն ժամանակ, այն դեպքերում, երբ հանգամանքները մնում են անհասկանալի, անհրաժեշտ է սպասել լրացուցիչ նյութերին և դատարանի որոշմանը։
Նա նաև ասել է, որ հակակոռուպցիոն մարմինների ղեկավարներն իր նկատմամբ որևէ պահանջ չունեն։
«Նրանք հրաշալի հասկանում են, որ ես նման բաներով չեմ զբաղվում։ Եվ դա ինձ համար կարևոր է», — նշել է Ուկրաինայի նախագահը։
Օգոստոսի 19-ին Ուկրաինայի Ազգային հակակոռուպցիոն բյուրոն և Մասնագիտացված հակակոռուպցիոն դատախազությունը հայտնել էին ենթադրյալ հանցավոր կազմակերպություն բացահայտելու հատուկ գործողության մասին, որում, ըստ քննության տվյալների, ներգրավված էին Նախագահի գրասենյակի պաշտոնյաներ։ Նույն օրը Մուդրայան ազատվել էր նախագահի գրասենյակի ղեկավարի տեղակալի պաշտոնից։