ԱՄՆ-ում կրիպտոշուկայի կարգավորման բացակայությունը չի խոչընդոտում բիթքոյնի դրական դինամիկային, սակայն կարող է ազդել դեցենտրալացված ֆինանսների (DeFi) հատվածի վրա: Այս մասին հայտնել է BlackRock-ի թվային ակտիվների բաժնի ղեկավար Ռոբբի Միթչնիկը, գրում է РБК-ն:
Բիթքոյնը՝ որպես պաշտպանական ակտիվ
Ըստ Միթչնիկի՝ բիթքոյնի վերջին աճը պայմանավորված է ԱՄՆ աճող պետական պարտքի թեմայով: Սա վերադարձրել է ներդրողների հետաքրքրությունը գլխավոր կրիպտոարժույթի նկատմամբ՝ որպես ոսկուն համարժեք պաշտպանական ակտիվի։ւ
BlackRock-ում ընդգծում են, որ կրիպտոշուկայի կարգավորմանն ուղղված CLARITY Act օրինագիծն այնքան կրիտիկական չէ բիթքոյնի համար, որքան ոլորտի մյուս ճյուղերի (օրինակ՝ DeFi-ի) համար, քանի որ բիթքոյնն արդեն ստացել է անհրաժեշտ կարգավորումների հիմնական մասը։ Չնայած ԱՄՆ նախագահ Դոնալդ Թրամփի աջակցությանը՝ Սենատը հետաձգել է օրինագծի քվեարկությունը մինչև աշնանային նստաշրջան:
Ռեկորդային պետական պարտք և դոլարի թուլացում
BlackRock-ի վերլուծաբանները հաստատում են իրենց ներդրումային թեզը. բիթքոյնը շարունակում է ծառայել որպես գլոբալ դրամական այլընտրանք և ազգային արժույթների արժեզրկումից ապահովագրման (հեջավորման) գործիք:
Հիմնական գործոնները, որոնք խթանում են հետաքրքրությունը բիթքոյնի նկատմամբ․
- ԱՄՆ ռեկորդային պետական պարտք․ ԱՄՆ ֆեդերալ պարտքը գերազանցել է ռեկորդային $40 տրիլիոնը, ինչը 2017 թվականի համեմատ ավելի քան երկու անգամ շատ է։
- Բյուջեի դեֆիցիտի աճ․ Պարտքի սպասարկման ծախսերի ավելացումը հանգեցնում է բյուջեի դեֆիցիտի մեծացման և ամերիկյան դոլարի թուլացման։
- Լիկվիդայնության ներառում․ ԱՄՆ Ֆինանսների նախարարությունը հայտարարել է 10–30 տարվա պետական պարտատոմսերի հետգնման ծավալների կրկնապատկման մասին, ինչը շուկայի մասնակիցներն ընկալում են որպես դրամավարկային քաղաքականության փաստացի մեղմացում։
Այս ֆոնին բիթքոյնի գինը մոտեցել է $80 հազարի ցուցանիշին: