Նիգերի մայրաքաղաք Նիամեյում շաբաթ գիշերը տեղի են ունեցել մի շարք պայթյուններ և ինտենսիվ հրաձգություններ։
Reuters-ի տվյալներով, հրաձգություններ են եղել քաղաքի մի քանի շրջաններում, այդ թվում՝ Դորի Համանիի միջազգային օդանավակայանի և նախագահական պալատի շրջանում։
Անվտանգության ծառայությունների աղբյուրը հայտնել է, որ զինված անձինք հարձակվել են օդանավակայանի վրա և փորձել ճեղքել նախագահական նստավայրի պահպանվող պարագիծը։ Սահելի պետությունների դաշինքի (AES) խորհրդարանի ներկայացուցիչ Բանա Վագանա Իբրահիմը հայտնել է, որ հարձակվողները նաև հարձակվել են 101-րդ ռազմական բազայի վրա, սակայն ուժայիններին հաջողվել է վերականգնել դրա նկատմամբ վերահսկողությունը։
Անվտանգության ծառայությունների մեկ այլ աղբյուր հայտնել է, որ իրականացվել են որոնողական գործողություններ, իսկ հարձակվողները «չեզոքացվել են», նրանց մի մասը փախել է։ Reuters-ը դեռևս չի կարողացել անկախորեն հաստատել այս տեղեկությունները։ Նիգերի ռազմական կառավարությունն իրավիճակը պաշտոնապես չի մեկնաբանել։
Նիգերը գտնվում է զինվորականների իշխանության տակ 2023 թվականի հուլիսյան հեղաշրջումից հետո։ Նոր իշխանությունները խզել են արևմտյան երկրների հետ կապերի զգալի մասը, ամրապնդել համագործակցությունը Ռուսաստանի հետ և Մալիի ու Բուրկինա Ֆասոյի հետ միասին ստեղծել Սահելի պետությունների դաշինքը։ Միևնույն ժամանակ տարածաշրջանի երկրները շարունակում են բախվել «Ալ-Քաիդայի» և «Իսլամական պետության» հետ կապված իսլամիստական խմբավորումների հարձակումներին։
Նիգերը նաև մնում է աշխարհում ուրանի խոշորագույն արտադրողներից մեկը։ Ռազմական իշխանությունները ուժեղացնում են պետական վերահսկողությունը ուրանի ոլորտի նկատմամբ և ավելի վաղ բռնագրավել էին ֆրանսիական Orano ընկերության ակտիվները։