Իսրայելը և Հունաստանը ստորագրել են մոտավորապես 3 միլիարդ եվրոյի լայնածավալ պաշտպանական համաձայնագիր, որը կոչվում է «Աքիլեսյան վահան»: Այս մասին հաղորդագրություն է տարածել Իսրայելի պաշտպանության նախարարության մամուլի ծառայությունը:
Պայմանագիրը ենթադրում է, որ իսրայելական կողմն Աթենքի կարիքների համար կկառուցի հակաօդային պաշտպանության և հակահրթիռային պաշտպանության առաջավոր բազմամակարդակ համակարգ:
Փաստաթղթի տակ իրենց ստորագրություններն են դրել Իսրայելի պաշտպանության նախարարության գլխավոր տնօրեն պահեստի գեներալ-մայոր Ամիր Բարամը և նրա հույն գործընկեր Իոանիս Բուրասը:
«Ըստ համաձայնագրի՝ Իսրայելը Հունաստանում կկառուցի համալիր բազմամակարդակ հակաօդային պաշտպանության համակարգ, որն ամբողջությամբ բաղկացած կլինի իսրայելական արտադրության համակարգերից և կօգտագործի պատերազմի ընթացքում Իսրայելի պաշտպանական կառույցների կողմից կուտակված լայնածավալ մարտական փորձը», – նշված է հաղորդագրության մեջ:
Իսրայելի պաշտպանության նախարարությունը նշել է, որ սա իսրայելահունական ռազմական համագործակցության պատմության մեջ խոշորագույն գործարքն է և առավել մասշտաբայիններից մեկը Իսրայելի ռազմական արդյունաբերության համար։