Սեպտեմբերի 1-ի գիշերը ռուս զինվորականները հրթիռներով և հարվածային դրոններով զանգվածային գրոհ են իրականացրել Կիևի և Կիևի մարզի վրա։ Ուկրաինայի մայրաքաղաքում հարվածների հետևանքով զոհվել է ութ մարդ, ևս հինգը, որոնց թվում՝ երեք երեխա, վիրավորվել է, հայտնել են Ուկրաինայի արտակարգ իրավիճակների պետական ծառայությունից (ՈւԱԻՊԾ)։ Գերատեսչության տվյալներով՝ հարվածի տակ են հայտնվել Դառնիցկի, Գոլոսիևսկի և Սոլոմյանսկի շրջանները։ Դառնիցկի շրջանում հրդեհներ են բռնկվել երկու վայրում, Գոլոսիևսկի շրջանում վնասվել է ոչ բնակելի շենք, իսկ Սոլոմյանսկի շրջանում բնակելի տունը մասամբ ավերվել է։ «Ուկրզալիզնիցա»-ում հայտնել են, որ հարվածներից մեկը հասցվել է երկաթուղային դեպոյին և ընկերության այլ օբյեկտներին։
Գնդակոծության տակ է հայտնվել նաև Կիևի մարզի Բորիսպոլ քաղաքը։ Տարածաշրջանի ռազմական վարչակազմի ղեկավար Տիմուր Տկաչենկոյի տվյալներով՝ գրոհի ընթացքում վնասվել է հինգ հարկանի բնակելի շենք։ Տարհանվել է 48 մարդ, ութ մարդ տուժել է, այդ թվում՝ մեկ երեխա։ Բացի այդ, մոտակա ավտոկայանատեղիում մեքենաներ են բռնկվել։ Մեկ այլ հարված հասցվել է մի ձեռնարկության, որտեղ զոհվել է մեկ մարդ, ևս մեկը վնասվածքներ է ստացել։ ՈւԱԻՊԾ-ում ավելի ուշ ճշտել են, որ Կիևի մարզի վրա հարձակման հետևանքով զոհվել է երեք մարդ, ևս 12-ը վիրավորվել է։
Նախորդ երեկոյան՝ օգոստոսի 31-ին, ռուս զինվորականներն անօդաչու սարքերով գրոհել էին Կիևի մարզը։ Բրովարի շրջանի Պոգրեբի գյուղում տուժել է ութ մարդ, հայտնել են ռազմական վարչակազմից։ Դրոնների թիրախ են դարձել Բուչայի, Բրովարի և Բորիսպոլի շրջանների պահեստները։ Հրդեհներ են բռնկվել։ Կիևի մարզի իշխանությունները նշել են, որ տարածաշրջանի դեմ գրոհը շարունակվում է արդեն հինգերորդ օրն անընդմեջ։