Չինաստանում ստեղծվել է ռոբոտների համար նախատեսված «մանկապարտեզ», որտեղ դրանք սովորում են ոչ թե մարդկանց տված պատրաստի հրահանգներով, այլ սեփական փորձի և սխալների միջոցով: Ուսումնական կենտրոնը հիմնադրել է չինական Tashan Technology ընկերությունը։
Հետազոտողների նպատակն է, որ ռոբոտները կարողանան ինքնուրույն ուսումնասիրել շրջակա միջավայրը, փորձարկումներ կատարել և դասեր քաղել իրենց սխալներից։ Նման մոտեցումը հնարավորություն կտա, որ դրանք շարունակեն հարմարվել նոր պայմաններին նույնիսկ շահագործման ընթացքում՝ լուծելով նաև այնպիսի խնդիրներ, որոնց համար նախապես չեն ծրագրավորվել։
Օրինակ, եթե մարզման ընթացքում ռոբոտը բախվում է պատին, այն կրկնում է փորձը՝ փոխելով շարժման ուղղությունը, որպեսզի նույն սխալը կրկին չկրկնի։ Այսպիսով, յուրաքանչյուր անհաջողություն վերածվում է ուսուցման արժեքավոր տվյալների։
Հետազոտողները նշում են, որ այս եղանակով ուսուցումը ավելի երկար ժամանակ կպահանջի, սակայն այն կստեղծի ավելի ճկուն և ինքնուրույն ռոբոտներ։ Երկարաժամկետ հեռանկարում ակնկալվում է, որ դրանք կկարողանան նաև փոխանակվել միմյանց ձեռք բերած փորձով։