2026 թվականի առաջին կիսամյակում պետական բյուջեից սոցիալական նպաստների և կենսաթոշակների համար ծախսվել է 652.9 մլրդ դրամ՝ մեկ տարում 122.4 մլրդ դրամով կամ 23.1%-ով ավելի։
Այս մասին BanksNews.am-ը տեղեկանում է 2026 թվականի առաջին կիսամյակում Հայաստանի Հանրապետության պետական բյուջեի կատարման ընթացքի վերաբերյալ տեղեկանքն ուսումնասիրելիս:
Աճը միայն կենսաթոշակներով չի պայմանավորված։ Պաշտոնական տեղեկատվության համաձայն՝ հիմնական գործոններից մեկն առողջության համընդհանուր ապահովագրության ներդրումն է, որի գծով առաջին կիսամյակում ծախսվել է 97.9 մլրդ դրամ։
Աշխատանքային կենսաթոշակների ծախսերն ավելացել են 16.1 մլրդ դրամով, իսկ անկանխիկ վճարումներից կենսաթոշակառուներին տրամադրվող հետվճարները՝ 12.9 մլրդ դրամով։
Սոցիալական բյուջեն՝ թվերով
| Ցուցանիշ | 2025 թ. I կիսամյակ | 2026 թ. I կիսամյակ | Փոփոխություն |
|---|---|---|---|
| Նպաստներ և կենսաթոշակներ | 530.5 մլրդ | 652.9 մլրդ | 🔺 +122.4 մլրդ / +23.1% |
| Սոցիալական նպաստներ | 262.4 մլրդ | 358.5 մլրդ | 🔺 +96.1 մլրդ / +36.6% |
| Կենսաթոշակներ | 268.1 մլրդ | 294.4 մլրդ | 🔺 +26.3 մլրդ / +9.8% |
| Առողջության համընդհանուր ապահովագրություն | — | 97.9 մլրդ | նոր ծախս |
| Աշխատանքային կենսաթոշակներ | 143.8 մլրդ | 159.9 մլրդ | 🔺 +16.1 մլրդ / +11.2% |
Բյուջեի կառուցվածքն ավելի խոսուն է․ սոցիալական նպաստներն ու կենսաթոշակները կազմել են ընթացիկ ծախսերի 47.8%-ը։ Այսինքն՝ ընթացիկ ծախսերի գրեթե յուրաքանչյուր երկրորդ դրամը բաժին է ընկել այս ուղղությանը։
Միաժամանակ հակառակ պատկերն է կապիտալ ծախսերում։ Մինչ սոցիալական նպաստների և կենսաթոշակների ծախսերը մեկ տարում աճել են 23.1%-ով, կապիտալ ծախսերը նվազել են 28.3%-ով կամ 83.7 մլրդ դրամով։
Սա արդեն բյուջետային քաղաքականության ավելի լայն հարց է առաջացնում․ պետական միջոցների աճող մասն ուղղվում է ընթացիկ սոցիալական պարտավորությունների կատարմանը, բայց արդյո՞ք նույն տեմպով ստեղծվում են այն ենթակառուցվածքներն ու կապիտալ ակտիվները, որոնք կապահովեն վաղվա տնտեսական աճը։