Նավթագազային ոլորտում ներդրումները ԱՄՆ նախագահ Դոնալդ Թրամփին բերել են 1,5-ից 4,4 միլիոն դոլար՝ Իրանի հետ պատերազմի սկսվելուց հետո, հայտնում է CNBC հեռուստաալիքը։
«Ռազմական գործողությունների առաջին վեց ամիսների ընթացքում Թրամփի ներդրումային հաշիվներում շարունակվել է էներգետիկ ընկերությունների բաժնետոմսերի ակտիվ առևտուրը։ Պատերազմի նախօրեից (փետրվարի 27) մինչև օգոստոսի 31-ը նրա նավթագազային ընկերություններում ինը խոշորագույն ներդրումները աճել են մոտավորապես 1,5-4,4 միլիոն դոլարով», – ասվում է հեռուստաալիքի հաղորդագրությունում։
Ինչպես նշում է հեռուստաալիքը, այն հաշվարկել է ամերիկացի առաջնորդի ինը ակտիվները՝ Chevron, ConocoPhilips, Exxon Mobil, Kinder Morgan, Marathon Petroleum, Occidental Petroleum, Phillips 66, Valero Energy և Williams Companies։
CNBC-ն, հղում անելով Սպիտակ տան ներկայացուցիչ Դևիս Ինգլին, հավելում է, որ ոչ Թրամփը, ոչ էլ նրա ընտանիքի անդամները հնարավորություն չունեն ուղղորդելու, ազդելու կամ ցուցումներ տալու իրենց ակտիվների վերաբերյալ, իսկ բոլոր ներդրումային որոշումները կայացվում են անկախ կառավարիչների կողմից։
ԱՄՆ-ն և Իսրայելը փետրվարի 28-ին սկսեցին հարվածներ հասցնել Իրանի տարածքում գտնվող օբյեկտներին, ինչին իրանական կողմը պատասխանեց իր հարվածներով։ Հունիսի կեսերին Թեհրանը և Վաշինգտոնը ստորագրեցին ռազմական գործողությունների դադարեցման մասին հուշագիր, սակայն ավելի ուշ կրկին փոխանակվեցին հարվածներով։ Այս պահին հակամարտությունը մնում է չկարգավորված։
Հակամարտության սրման պատճառով գրեթե կանգ է առել նավարկությունը Հորմուզի նեղուցով։ Սա նավթի, նավթամթերքների և հեղուկացված բնական գազի մատակարարման առանցքային ուղի է համաշխարհային շուկա։ Արդյունքում՝ վառելիքի գները բարձրացել են աշխարհի երկրների մեծ մասում։