Մեզանից շատերը թերևս առնվազն մեկ անգամ մտել են TikTok «ընդամենը 5 րոպեով» և անկանխատեսելիորեն այնտեղ անցկացրել ամբողջ մեկ ժամ: Կարճ տեսանյութերի այս հարթակը փոխեց ոչ միայն սոցիալական ցանցերը, այլև ինֆորմացիա սպառելու մշակույթը:
Բայց ինչպե՞ս սկսվեց ամեն ինչ, և ո՞վ է կանգնած այս գլոբալ ֆենոմենի ետևում:
«Ձախողված» կրթությունից մինչև Musical.ly-ի հեղափոխությունը
TikTok-ի պատմությունը սկսվել է դեռևս 2014 թվականին: Չինացի ձեռնարկատերեր Լուի Յանգը և Ալեքս Չժուն ստեղծեցին Cicada հավելվածը, որը նախատեսված էր 3-5 րոպեանոց ուսուցողական տեսանյութերի համար: Գաղափարը ձախողվեց. մարդիկ չէին ցանկանում կարճ ժամանակում սովորեցնել կամ սովորել:
Հասկանալով սխալը՝ հիմնադիրները կտրուկ փոխեցին ուղղությունը դեպի զվարճանք և ստեղծեցին Musical.ly-ն: Ֆորմուլան պարզ էր.
- Հեշտ ստեղծվող բովանդակություն (երգերի տակ շուրթերի շարժում / lip-sync),
- Ցածր պահանջներ որակի նկատմամբ,
- Արագ սպառում:
2015 թվականին հավելվածն արդեն գլխավորում էր աշխարհի ամենաառաջատար աղյուսակները:
ByteDance-ի գործարքն ու 2020-ի բումը
2017 թվականին չինական ByteDance հսկան, որն արդեն ուներ TikTok-ը, 1 միլիարդ դոլարով գնեց Musical.ly-ն և միավորեց երկու հարթակները: Lip-sync-երին փոխարինելու եկան հումորային, կրթական տեսանյութերն ու մարտահրավերները:
Իսկ իսկական պայթյունը տեղի ունեցավ 2020 թվականի համավարակի ընթացքում: Տանը փակված մարդիկ զվարճանք ու շփում էին փնտրում, և TikTok-ը հասավ իր գլոբալ գագաթնակետին:
Ինչո՞ւ է TikTok-ը «սոսնձում» մեզ էկրաններին
Բեյլորի համալսարանի հետազոտողների համաձայն՝ TikTok-ի գաղտնիքը ավտոմատ նվագարկման, ալգորիթմի բարձր ճշգրտության և անսպասելիության էֆեկտի մեջ է:
Ալգորիթմն ակնթարթորեն հասկանում է ձեր նախասիրությունները և անդադար մատուցում նոր բովանդակություն: Սա ստեղծում է ժամանակի զգացողության կորուստ, որը երկարաժամկետ հատվածում կարող է նվազեցնել ուշադրության կենտրոնացումը և առաջացնել կախվածություն:
Ստվերային ղեկավարը. Ո՞վ է Շոու Զի Չուն
Չնայած TikTok-ն ամենուր է, դրա գլխավոր տնօրենի (CEO) մասին քչերը գիտեն: Շոու Զի Չուն (Shou Zi Chew) ծնունդով Սինգապուրից է, ավարտել է Հարվարդը, աշխատել Goldman Sachs-ում, իսկ ավելի ուշ ստանձնել TikTok-ի ղեկը:
Չուն վարում է բավականին զուսպ կյանք և հազվադեպ է աղմկոտ հարցազրույցներ տալիս: Սակայն նրա մասին ամենահետաքրքիր փաստն այլ է. աշխարհի ամենակախվածություն առաջացնող ցանցի ղեկավարն իր սեփական փոքրահասակ երեխաներին արգելում է օգտվել TikTok-ից: Նա դա պատճառաբանում է նրանով, որ Սինգապուրում մինչև 13 տարեկան երեխաներին օրենքով արգելված է հավելվածից օգտվել, իսկ ինքը՝ որպես ծնող, նախընտրում է պաշտպանել երեխաներին անսահմանափակ էկրանային ժամանակից:
Այսօր TikTok-ը պարզապես զվարճալի հավելված չէ. այն միլիարդանոց բիզնես է, որը դարձել է ժամանակակից թվային մշակույթի ամենաազդեցիկ, բայց միևնույն ժամանակ ամենավիճահարույց գործիքներից մեկը:
ԿԱՐԴԱՑԵՔ ՆԱԵՎ
Բիլ Գեյթսի ուղին. ինչպե՞ս նա դարձավ կլիմայական առաջնորդ միլիարդատերերի շարքում