Ֆրանսիայի նախագահ Էմանուել Մակրոնը սեպտեմբերի 29–30-ին պետական այցով կմեկնի Իսպանիա։ Այդ մասին հայտնել են Իսպանիայի կառավարության ներկայացուցիչները։
Ֆրանսիայի նախագահի գրասենյակի հայտարարության համաձայն՝ սա 2009 թվականից ի վեր Ֆրանսիայի նախագահի առաջին պետական այցն է Իսպանիա և ընդգծելու է երկու երկրների միջև հարաբերությունների խորությունն ու համագործակցության լայն շրջանակը։
Մակրոնի և Սանչեսի հանդիպման օրակարգում կլինեն եվրոպական և միջազգային կարևոր հարցեր, այդ թվում՝ Ուկրաինայում և Մերձավոր Արևելքում ստեղծված իրավիճակը։ Կողմերը կքննարկեն նաև ժողովրդավարության և երիտասարդների պաշտպանության հարցերը՝ հատկապես սոցիալական ցանցերի և արհեստական բանականության հետ կապված մարտահրավերների համատեքստում։
Մակրոնի վերջին այցը Իսպանիա տեղի էր ունեցել 2023 թվականի հունվարին, երբ երկու երկրների ղեկավարները ստորագրել էին բարեկամության պայմանագիր, որը մինչ այժմ Իսպանիայի կողմից չի վավերացվել։