ՄԱԿ-ի Կենսաբազմազանության մասին կոնվենցիայի Կողմերի 17-րդ համաժողովի (CBD COP17) ընթացքում` Կանաչ գոտում հոկտեմբերի 23-ին կանցկացվի «Կլիմայի փոփոխությունը և կանայք» մրցանակաբաշխությունը։ Իսկ հոկտեմբերի 27-ին հաղթողների մասնակցությամբ կանցկացվի թեմատիկ պանելային քննարկում։
Արդեն մեկնարկել է մրցանակաբաշխության COP17 հատուկ թողարկման հայտերի ընդունումը։ Մրցանակաբաշխության կազմակերպիչներն են ՀՀ շրջակա միջավայրի նախարարությունը և «Կանայք կլիմայում և էներգետիկայում» ՀԿ-ն։
Մրցանակաբաշխության նպատակն է խրախուսել և տեսանելի դարձնել կանանց առաջնորդությունն ու ներդրումը կլիմայի փոփոխության և կենսաբազմազանության պահպանության ոլորտներում իրականացվող գործողություններում և լուծումներում։
Մրցանակաբաշխության առանցքային մոտեցումն է՝ «ճանաչումից դեպի լուծումների առաջմղում»։ Հաղթողները հնարավորություն կունենան COP17-ի շրջանակում ներկայացնելու իրենց փորձը, լուծումները և դրանց ընդլայնման ներուժը։
Մրցանակաբաշխության անվանակարգերն են․
- Կլիմայի փոփոխության մեղմում և կենսաբազմազանության պահպանում
- Կլիմայի փոփոխությանը հարմարվողականություն և էկոհամակարգերի դիմակայունություն
- Համայնքային գործողություններ և քաղաքականություն
- Կլիմայի և կենսաբազմազանության խնդիրների ու լուծումների հաղորդակցություն
- Կլիմայի և կենսաբազմազանության կրթություն բոլորի համար
- Կլիմայական և բնապահպանական ֆինանսավորում ու նորարարական լուծումներ
- Երիտասարդները կլիմայական և բնապահպանական գործողություններում
Յուրաքանչյուր անվանակարգի հաղթողին կտրամադրվի 300,000 ՀՀ դրամ՝ ներառյալ կիրառելի հարկերը։
Առաջին անգամ մրցույթն ունենալու է «Հատուկ ճանաչում» բաղադրիչ։ Հատուկ ճանաչումը կանանց կլիմայական և կենսաբազմազանության առաջնորդության աջակից տղամարդու համար է։
Հայտերն ընդունվում են ինքնաառաջադրմամբ կամ այլ կազմակերպության կամ կառույցի կողմից առաջադրմամբ։
- Ինքնաառաջադրվել կարող են տարբեր ոլորտներում աշխատող կամ գործունեություն իրականացնող կանայք։
- Թեկնածուն պետք է ունենա ներկայացվող լուծման մշակման, իրականացման, ղեկավարման կամ առաջմղման գործում հստակ և հիմնավորելի դերակատարում։
- Թեկնածուներ կարող են առաջադրել պետական և տեղական կառավարման մարմինները, հասարակական և միջազգային կազմակերպությունները, գիտական ու կրթական հաստատությունները, մասնավոր ընկերությունները, մասնագիտական միավորումները և այլ կառույցներ։
- Կազմակերպությունը կարող է առաջադրել մեկից ավելի թեկնածու կամ լուծում, իսկ մեկ լուծումը կարող է ներկայացվել առավելագույնը երկու անվանակարգում, եթե համապատասխանում է երկու անվանակարգերի չափորոշիչներին։
- Ինքնաառաջադրման դեպքում անհրաժեշտ է ներկայացնել առնվազն մեկ երաշխավորագիր։
- Ընդունվում են վերջին հինգ տարիների ընթացքում իրականացված կամ շարունակվող այն լուծումները, որոնք արդեն ունեն ներկայացման և գնահատման ենթակա արդյունքներ։
Հատուկ ճանաչման համար տղամարդ թեկնածուն կարող է առաջադրվել կանանց, կազմակերպությունների, հաստատությունների կամ մասնագիտական գործընկերների կողմից։ Ինքնաառաջադրում չի ընդունվում։
Հայտերի ընդունման վերջնաժամկետն է 2026 թ. սեպտեմբերի 30-ը։
Հայտադիմումը՝ այստեղ։
Մասնակցության պայմաններ, անվանակարգեր և ժամանակացույց՝ այստեղ։
Մրցանակաբաշխության գործընկերներն են IDBank-ը, «ՕքսԵՋեն» հիմնադրամը, ՄԱԿ-ի զարգացման ծրագիրը և ՄԱԿ Կանայք կառույցը։
Սեպտեմբեր 16, 2026 at 16:36