Մադրիդում բնակարանից վտարված 87-ամյա Մարիկարմեն Աբասկալը կկարողանա վերադառնալ իր տուն՝ նոր վարձակալության պայմանագրի համաձայն, հայտնել է նրա փաստաբանը։
Աբասկալին սեպտեմբերի 23-ին պատգարակով հեռացրել էին ավելի քան 70 տարի բնակեցված բնակարանից, որից հետո նա տեղափոխվել էր հիվանդանոց։ Դեպքը լայն արձագանք էր ստացել Իսպանիայում և դարձել երկրի բնակարանային ճգնաժամի խորհրդանիշներից մեկը։
Բնակարանը 2018 թվականին ձեռք բերած Urbagestión ընկերությունը վարձավճարը 500 եվրոյից բարձրացրել էր մինչև 2650 եվրո։ Ավելի ուշ այն նվազեցվել էր մինչև 1650 եվրո, սակայն այդ գումարը նույնպես գերազանցում էր Աբասկալի 1350 եվրո կենսաթոշակը։
Նրա փաստաբանի խոսքով՝ կողմերը նախնական համաձայնության են եկել նոր պայմանագրի շուրջ, որով Աբասկալը կվճարի իրեն հասանելի գումարին մոտ վարձավճար։ Համաձայնագիրը դեռ պետք է ստորագրվի։
Աբասկալի վտարումը բողոքի ցույցերի պատճառ էր դարձել Մադրիդում։ Իսպանիայի վարչապետ Պեդրո Սանչեսը հայտարարել է, որ կառավարությունը բնակարանային ճգնաժամի վերաբերյալ նոր աջակցության միջոցներ կքննարկի։
Top News
