Հայաստանի արտգործնախարար Արարատ Միրզոյանը Վարշավայի անվտանգության ֆորումում հայտարարել է, որ հայ-թուրքական հարաբերությունների կարգավորման գործընթացը հասունացել է։
«Մենք կարող ենք հեշտությամբ վաղն առավոտյան լրահոսում գտնել մի վերնագիր հայ-թուրքական սահմանի բացման մասին: Մենք կարգավորում ենք մեր հարաբերությունները Թուրքիայի հետ։ Սահմանը դեռ փակ է, բայց կարծում եմ՝ գործընթացը բավականին հասունացել է»,- ասել է Միրզոյանը։
Անդրադառնալով Ադրբեջանի հետ հարաբերություններին՝ Միրզոյանը հայտարարել է, որ խաղաղությունն արդեն հաստատված է։
Նրա խոսքով՝ Հայաստանը նպատակ ունի բարելավել հարաբերությունները հարևան երկրների հետ՝ անկախ այլ հանգամանքներից։ Նա ընդգծել է, որ այդ գործընթացը որևէ կերպ պայմանավորված չէ Հայաստանի եվրոպական ձգտումներով։
Միևնույն ժամանակ, Միրզոյանի գնահատմամբ՝ եթե Հայաստանը նպատակ ունի դառնալ Եվրամիության լիիրավ անդամ, ապա հարևանների հետ խնդիրներն ու հակամարտությունները կարող են վնասել այդ գործընթացին։