ԵՐԵՎԱՆ, 15 հոկտեմբերի․ /ԱՌԿԱ/. Հայաստանում օրենսդրական փոփոխություններով նախատեսվում է բանկերի կամ վարկային կազմակերպությունների մասնակցությամբ անշարժ գույքի գրավի խառը տիպային պայմանագրերը էլեկտրոնային եղանակով կնքելու հնարավորություն՝ առանց նոտարական վավերացման։
Այս մասին Facebook-ում հայտնել է ՀՀ Կադաստրի կոմիտեի ղեկավար Սուրեն Թովմասյանը։
Նրա փոխանցմամբ՝ ՀՀ քաղաքացիական օրենսգրքում լրացումներ և փոփոխություններ կատարելու մասին օրենքի համապատասխան դրույթները քննարկվել են Կադաստրի կոմիտեի ղեկավարին կից հասարակական խորհրդի նախօրեին կայացած նիստում։
Նիստի մասնակիցներն անդրադարձել են նաև անշարժ գույքի գնահատման ոլորտում ուսումնամեթոդական ապահովման բարելավման և մասնագիտական գործունեության թվայնացման ուղղությունների ներառման հարցերին։
Քննարկումների ընթացքում խորհրդի անդամները ներկայացրին իրենց դիտարկումներն ու առաջարկությունները՝ անդրադառնալով օրակարգային հարցերին, ոլորտային գործընթացների կատարելագործման հնարավորություններին և օրենսդրական կարգավորումների բարելավմանն ուղղված նախաձեռնություններին։