Իրանի և ԱՄՆ-ի միջև բանակցային գործընթացը վտանգի տակ է Իրանի ղեկավարության ներսում առկա սուր անհամաձայնությունների, ինչպես նաև միջուկային հարցի վերաբերյալ Գերագույն առաջնորդ Մոջթաբա Խամենեիի մերձավոր շրջապատի կոշտ դիրքորոշման պատճառով։
Այս մասին գրում է Iran International-ը։
Աղբյուրները պնդում են, որ Իրանի պատվիրակության՝ բանակցությունների նոր փուլի համար Իսլամաբադ նախատեսված ուղևորությունից առաջ Գերագույն առաջնորդի մերձավոր շրջապատից հրաման է տրվել չքննարկել միջուկային ծրագիրը։ Սա առաջացրել է Իրանի արտաքին գործերի նախարարության կտրուկ արձագանքը. ըստ տեղեկությունների՝ արտաքին գործերի նախարար Աբբաս Արաղչին նման պայմաններում բանակցություններին մասնակցելը անվանել է «անօգուտ» և նման դիրքորոշումը գործնականում հավասարեցրել է դիվանագիտական գործընթացի համար «մահվան դատավճռի»։
Ըստ տեղեկությունների՝ դիվանագիտական խումբը նաև նկատողություն է ստացել նախկինում սահմանված «կարմիր գծերը» խախտելու համար։ Ավելին, մայիսի 2-ին նախատեսված նոր բանակցությունները, ի վերջո, չեղարկվել են Հորմուզի նեղուցի շուրջ իրավիճակի սրման և կողմերի միջև փոխադարձ մեղադրանքների պատճառով։
Թեհրանում ներքաղաքական պառակտումը նույնպես լրացուցիչ ճնշում է ստեղծում։ Ըստ աղբյուրների՝ Խամենեին դեմ է բանակցությունների շարունակմանը և Վաշինգտոնի հետ երկխոսության երկարաձգմանը։ Իրանի խորհրդարանը նրա դիրքորոշումը բնութագրել է որպես «կոշտ և որոշիչ երկրի անվտանգության ուղու համար»։
Միևնույն ժամանակ, իրանական վերնախավի ներսում սրվում է հակամարտությունը բանակցությունների կողմնակիցների և ավելի արմատական ուժերի միջև։ Ըստ լրատվամիջոցների հաղորդագրությունների, խորհրդարանի խոսնակ Մոհամմադ Բաղեր Ղալիբաֆը քննադատել է ԱՄՆ-ի հետ համաձայնագրի հակառակորդներին՝ նախազգուշացնելով երկրի ներսում քաղաքական ճգնաժամի հետագա սրման սպառնալիքի մասին։