Տիգրանաշենի երեխաները քաղաքականություն չեն ուզում։ Նրանք պարզապես ուզում են խաղալ, մեծանալ ու ապրել իրենց հայրենի գյուղում։ Բայց, պարզվում է, այս իշխանությունների համար անգամ մանկական խաղահրապարակը կարող է քաղաքական խնդիր դառնալ։ Այս մասին գրել է «Ուժեղ Հայաստան» խմբակցության պատգամավոր Ռուբեն Մխիթարյանը։
«Երբ պետությունը գյուղում կառուցվող խաղահրապարակի մեջ վտանգ է տեսնում, իսկ այդ նույն գյուղի ապագայի վերաբերյալ հստակ երաշխիքներ չի տալիս, ուրեմն խնդիրն ամենևին էլ խաղահրապարակը չէ։
«Ուժեղ Հայաստանը» խոսում է ուժեղ համայնքների, ապահով սահմանների ու արժանապատիվ կյանքի մասին։ Եվ դա սկսվում է հենց այսպիսի փոքր, բայց կարևոր գործերից։
Տիգրանաշենի երեխաները պետք է ունենան ոչ միայն բարեկարգ խաղահրապարակ, այլև վստահություն, որ վաղը շարունակելու են ապրել իրենց տանը, իրենց գյուղում, իրենց հայրենիքում։ Երեխաների ապագան մի՛ դարձրեք ձեր քաղաքական վախերի պատանդը։
Տիգրանաշենում պետք է ոչ թե վախենան խաղահրապարակ կառուցելուց, այլ վախենան գյուղն առանց ապագայի թողնելուց»,– նշել է Մխիթարյանը։