Թուրքիայի նախագահ Ռեջեփ Թայիփ Էրդողանն ու Ֆրանսիայի նախագահ Էմանուել Մակրոնը երեքշաբթի՝ հոկտեմբերի 27-ին, հեռախոսազրույցի ընթացքում քննարկել են երկկողմ հարաբերությունները, ինչպես նաև տարածաշրջանային և գլոբալ հարցեր։
Այս մասին հայտնում է Թուրքիայի նախագահի աշխատակազմի հաղորդակցությունների վարչությունը։
Գերատեսչության տվյալներով՝ զրույցի ընթացքում Էրդողանը նշել է, որ ՄԱԿ-ի նոր գլխավոր քարտուղարը պետք է ունենա անհրաժեշտ տեսլական և փորձ՝ կազմակերպությունում անհրաժեշտ բարեփոխումներն արդյունավետ իրականացնելու համար։
Բացի այդ, Էրդողանը Մակրոնին հրավիրել է մասնակցելու ՄԱԿ-ի՝ կլիմայի փոփոխության հարցերով COP31 համաժողովի շրջանակում Թուրքիայում կայանալիք առաջնորդների գագաթնաժողովին, ասվում է հաղորդագրության մեջ։
Իր հերթին Մակրոնը շնորհավորել է Էրդողանին Թուրքիայի Հանրապետությունում հոկտեմբերի 29-ին նշվող Հանրապետության օրվա առթիվ։
ՄԱԿ-ի գործող գլխավոր քարտուղար Անտոնիու Գուտերեշի լիազորությունների ժամկետն ավարտվում է 2026 թվականի դեկտեմբերի 31-ին։