Երաժշտություն, պար, ջերմ ժպիտներ ու բարձր տրամադրություն․ հոկտեմբերի 23-ին «Հուսո տուն» բարեգործական կենտրոնում տոնական մթնոլորտ էր։ Առիթը «Հուսո տան» շենքի շահագործման 20-ամյակն ու «Գթության խոհանոց» բարեգործական ծրագրի 33-րդ տարեշրջանի մեկնարկն էին։
Ավելի քան երեք տասնամյակ իրականացվող ծրագիրը միտված է սոցիալապես անապահով և խոցելի խմբերի ներկայացուցիչներին աջակցելուն՝ նրանց առօրյան դարձնելով առավել բարեկեցիկ ու հոգատարությամբ լի։
Տոնական օրվա հյուրերի թվում էին Երևանի քաղաքապետ Տիգրան Ավինյանը, միջազգային գործընկերներ, կամավորներ և կենտրոնի շահառուներ։
ՆԳ նախարարության և բարեգործական կենտրոնի համագործակցության շրջանակում տարբեր ձևաչափերով միջոցառումների անցկացումն արդեն գեղեցիկ ավանդույթ է դարձել։ Այս անգամ ևս ՆԳՆ մշակույթի կենտրոնի կազմակերպմամբ կենտրոնի շահառուների համար անցկացված միջոցառմանը ելույթներով հանդես են եկել ՆԳՆ ոստիկանության երգչախումբն ու ոստիկանության գվարդիայի երգի և պարի համույթը։
Օրը ևս մեկ անգամ հիշեցրել է, որ բարությունն ու հոգատարությունը դրսևորվում են ոչ միայն խոսքերով, այլև մարդկանց նվիրած ուշադրությամբ, միասին անցկացրած ջերմ պահերով ու անկեղծ ժպիտներով։