Հնդկաստանը վեց ամսվա ընթացքում՝ մինչև սեպտեմբեր, վառելիքի արտահանումից ստացել է 2,59 տրլն հնդկական ռուփի կամ 27,2 մլրդ դոլար։ Այս մասին հայտնում է The Economic Times-ը՝ հղում անելով Հնդկաստանի նավթի նախարարության տվյալներին։
Անցած տարվա նույն ժամանակահատվածի համեմատ՝ ռուփիով հաշվարկված արտահանման արժեքն աճել է 50%-ով։ Աճին նպաստել է նաև հնդկական արժույթի արժեզրկումը ԱՄՆ դոլարի նկատմամբ։
Արտահանման արժեքի աճին ամենամեծ ներդրումն ունեցել է դիզելային վառելիքը։ Դրա արտահանման արժեքն աճել է 58%-ով՝ հասնելով 1,2 տրլն ռուփիի կամ 12,6 մլրդ դոլարի, թեև ֆիզիկական ծավալը տարեկան կտրվածքով նվազել է 19%-ով։
Դիզելային վառելիքի համաշխարհային շուկայում ստեղծված ճգնաժամի ֆոնին Հնդկաստանի նավթի նախարար Հարդիփ Պուրին անցյալ ամիս հայտարարել էր, որ երկիրը կշարունակի դիզել արտահանել՝ համաշխարհային պահանջարկը բավարարելու և վառելիքի ճգնաժամը մեղմելու համար։
Նրա խոսքով՝ Հնդկաստանի նավթավերամշակման հզորությունները ներկայումս կազմում են օրական շուրջ 5,36 մլն բարել։ Հաջորդ տարի նախատեսվում է այդ ցուցանիշը հասցնել օրական 5,8 մլն բարելի, իսկ մինչև 2032 թվականը՝ 6,4 մլն բարելի։
Ավելի վաղ Ռուսաստանի փոխվարչապետ Ալեքսանդր Նովակը գնահատել էր, որ դիզելային վառելիքի համաշխարհային դեֆիցիտը կազմում է համաշխարհային առևտրի ծավալի 25%-ը։
Հիշեցնենք, որ հոկտեմբերի 9-ին Ռուսաստանի և ԱՄՆ-ի նախագահներ Վլադիմիր Պուտինն ու Դոնալդ Թրամփը պայմանավորվել էին ռուսական նավթամթերքը համաշխարհային և ամերիկյան շուկաներ մատակարարելու շուրջ։
Ռուսաստանի փոխվարչապետ Ալեքսանդր Նովակի խոսքով՝ մինչև տարեվերջ Ռուսաստանը կարող է վերականգնել դիզելային վառելիքի մատակարարումները՝ ամսական հասցնելով դրանք 3-3,5 մլն տոննայի, ինչպես մինչև ճգնաժամը։
Նրա գնահատմամբ՝ լրացուցիչ մատակարարումներն արդեն դրական ազդեցություն են ունենում շուկայի վրա․ դիզելային վառելիքի համաշխարհային գները նվազել են։