Հոկտեմբերի 29-ին Բաքվում Թուրքիայի դեսպանատանը Հանրապետության օրվա կապակցությամբ կազմակերպված ընդունելության ժամանակ Ադրբեջանը ներկայացրել է Ադրբեջանի թվային զարգացման և տրանսպորտի նախարար Ռաշադ Նաբիևը, թեև նախկինում նման միջոցառումներին պետությունը ներկայացնում էր Ադրբեջանի խորհրդարանի նախագահ Սահիբա Գաֆարովան, հայտնել են ադրբեջանական լրատվամիջոցները։
Միաժամանակ, ինչպես նշվել է, այս տարի Անկարան ինքն է խախտել երկարամյա ավանդույթը, քանի որ մայիսի 28-ին Ադրբեջանի Անկախության օրվա տոնակատարությանը Թուրքիան ներկայացրել է ոչ թե խորհրդարանի նախագահը կամ փոխնախագահը, ինչպես նախկինում, այլ տրանսպորտի և ենթակառուցվածքների նախարար Աբդուլքադիր Ուրալօղլուն։
Բացի այդ, ինչպես հաղորդվել է, Թուրքիայի ԱԳՆ-ն մերժել է Ադրբեջանի դեսպանատան՝ Անկախության օրվա կապակցությամբ խորհրդանշական կառույցներն Ադրբեջանի դրոշի գույներով լուսավորելու խնդրանքը, թեև նախկինում նման խնդրանքները բավարարվում էին։