Կանադայի վարչապետ Մարկ Քարնին հայտարարել է ԱՄՆ նախագահ Դոնալդ Թրամփի հետ հնարավոր առևտրային համաձայնագրի շուրջ բանակցություններում առաջընթացի մասին։ Ըստ նրա, կողմերը առաջիկա շաբաթներին կշարունակեն աշխատել համաձայնության հասնելու ուղղությամբ։ Այս մասին Քարնին հայտնել է կիրակի օրը սոցիալական ցանցերում՝ ԱՄՆ միջանկյալ ընտրություններից երկու օր առաջ, գրում է Associated Press-ը։
«Մեր թիմերն այժմ առաջիկա շաբաթներին կաշխատեն՝ այդ արդյունքին հասնելու համար», — գրել է Քարնին՝ Թրամփի հետ զրույցը որակելով կառուցողական։
Կանադայի վարչապետը հայտնել է, որ քննարկումը հնարավոր համաձայնագրի պարամետրերի շուրջ նախորդ շփումների շարունակությունն էր։ Համաձայնագիրը պետք է նպաստի աշխատատեղերի ստեղծմանը, ընտանիքների ծախսերի նվազեցմանը և Կանադայի լեզուների, մշակույթի ու ինքնիշխանության պաշտպանությանը։
Քարնիի հայտարարությունը վկայում է բանակցային գործընթացում մթնոլորտի բարելավման մասին այն բանից հետո, երբ օգոստոսին Կանադան դուրս եկավ բանակցություններից՝ մերժելով Վաշինգտոնի պահանջները։ Այն ժամանակ վարչապետը հայտարարել էր, որ ամերիկյան պայմանները սպառնում են երկրի ինքնիշխանությանը, ֆրանսերենի պաշտպանությանը և ավտոմոբիլային արդյունաբերությանը։ Ի պատասխան՝ Թրամփը 50% մաքսատուրքեր սահմանեց մոտ 20 միլիարդ դոլար ընդհանուր արժեքով կանադական ապրանքների նկատմամբ, որից հետո Օտտավան պատասխան միջոցներ ձեռնարկեց։
Բանակցությունները հետագայում վերսկսվեցին, սակայն դրանց ընթացքը շարունակում էր անհարթ մնալ։ Դեռ չորեքշաբթի Քարնին ասում էր, որ երկրները պատրաստ չեն համաձայնագիր կնքել մինչև նոյեմբերի 3-ի միջանկյալ ընտրությունները։
Այժմ կողմերը քննարկում են կանադական պողպատի և ավտոմեքենաների նկատմամբ ամերիկյան մաքսատուրքերի հնարավոր մեղմացումը։ Հնարավոր գործարքի մանրամասները դեռ չեն բացահայտվում։
Առևտրային հակամարտությունը դարձել է ԱՄՆ նախընտրական քարոզարշավի թեմաներից մեկը, հատկապես Միչիգանում և Մենում, որտեղ հանրապետական թեկնածուները քննադատության են ենթարկվել տեղական ձեռնարկություններին մաքսատուրքերի հասցրած վնասի պատճառով։ Միչիգանից Սենատի հանրապետական թեկնածու Մայք Ռոջերսը կոչ է արել դադարեցնել առևտրային պատերազմը։
Վաշինգտոնի հետ հակամարտության ֆոնին Քարնին նաև ձգտում է դիվերսիֆիկացնել Կանադայի արտաքին առևտուրը։ Ուրբաթ օրը Կանադան և Եվրամիությունը հայտարարել են տնտեսության և անվտանգության ոլորտներում նոր գործընկերության մասին։ Օտտավան նախատեսում է հաջորդ տասնամյակի ընթացքում կրկնապատկել արտահանումը դեպի ԱՄՆ-ից դուրս գտնվող շուկաներ։