ԵՐԵՎԱՆ, 3 նոյեմբերի․ /ԱՌԿԱ/․ ՀՀ պետական եկամուտների կոմիտեն (ՊԵԿ) հիշեցրել է Ռուսաստանի Դաշնությունից Հայաստան և մի շարք այլ պետություններ ռուսական կանխիկ ռուբլու արտահանման սահմանափակումների մասին։
Ինչպես նշվում է գերատեսչության հաղորդագրության մեջ, արգելքը վերաբերում է Ռուսաստանի Դաշնությունից Եվրասիական տնտեսական միության (ԵԱՏՄ) անդամ պետություններ՝ Հայաստան, Բելառուս, Ղազախստան և Ղրղզստան, ինչպես նաև Ադրբեջան, Տաջիկստան և Ուզբեկստան ՌԴ կանխիկ արժույթի արտահանմանը։
Մասնավորապես, արգելքը գործում է՝
- ֆիզիկական անձանց համար՝ 1 միլիոն ռուբլին գերազանցող գումարի արտահանման դեպքում,
- իրավաբանական անձանց և անհատ ձեռնարկատերերի համար՝ անկախ գումարի չափից, բացառությամբ հրամանագրով սահմանված դեպքերի։
ՊԵԿ-ը հորդորել է Ռուսաստանի Դաշնությունից կանխիկ գումարի արտահանում պլանավորելիս, նախապես ծանոթանալ գործող կարգավորումներին, նախատեսված բացառություններին և հետևել դրանց պահպանմանը։
Սահմանափակումները նախատեսված են ՌԴ նախագահի 2026 թվականի սեպտեմբերի 29-ի թիվ 706 հրամանագրով, որն ուժի մեջ է մտել ստորագրման օրը։