Լեհաստանի դատախազությունը հետաքննություն է սկսել Սահմանադրական տրիբունալի դատավորներ Աննա Կորվին-Պյոտրովսկայի և Քշիշտոֆ Մարկևիչի վրա հարձակման, ինչպես նաև ուժի և ապօրինի սպառնալիքների միջոցով դատարանի աշխատանքի վրա ազդելու փորձի առնչությամբ։ Դրա մասին երեքշաբթի հայտնել է Ազգային դատախազության մամուլի քարտուղար Աննա Ադամյակը, հաղորդում է Polsat News-ը։
Միջադեպը տեղի է ունեցել հոկտեմբերի 30-ի լույս 31-ի գիշերը Վարշավայում՝ Սահմանադրական տրիբունալի շենքում։ Դատախազության նախնական տվյալներով՝ մի քանի անձ գործել է համատեղ. նրանք կտրուկ մոտեցել են դատավորներին, ուժով հեռացրել նրանց շենքի մուտքից՝ խախտելով վերջիններիս անձնական անձեռնմխելիությունը, ապա շենք ներխուժել։
Քննության վարկածով՝ այս գործողությունների նպատակը բռնության և ապօրինի սպառնալիքների միջոցով Սահմանադրական տրիբունալի աշխատանքի վրա ճնշում գործադրելն էր։ Սակայն դատավորների վճռական գործողությունների շնորհիվ միջադեպի մասնակիցներին չի հաջողվել հասնել ցանկալի արդյունքի։
Դատախազությունից հայտնել են, որ հետաքննությունը սկսել են սեփական նախաձեռնությամբ՝ լրատվամիջոցների հրապարակումները, ներառյալ՝ տեղի ունեցածի տեսագրությունները, ինչպես նաև պաշտոնատար անձանց կազմած ծառայողական զեկուցագրերը վերլուծելուց հետո։
Գործը քննվում է Լեհաստանի քրեական օրենսգրքի՝ պաշտոնատար անձանց վրա հարձակմանը և պետական մարմնի գործունեության վրա ապօրինի ներգործության փորձին վերաբերող հոդվածներով։ Հետաքննությունն իրականացնում է Ազգային դատախազության հատուկ խմբի դատախազը։ Խումբը զբաղվում է դատական գործընթացներին այն դատավորների մասնակցության հարցերով, որոնք նշանակվել են Դատական իշխանության ազգային խորհրդի մասնակցությամբ ընթացակարգի միջոցով՝ այն կազմով, որով այն գործում է 2017 թվականից ի վեր: