Վենեսուելայի քաղաքացի Ռոննի Յորդրիքս Գուանիպա Կրինոսին ձերբակալել են Վաշինգտոնում՝ Սպիտակ տան մոտ, այն բանից հետո, երբ նա Գաղտնի ծառայության աշխատակիցներին հայտնել է, որ ձայներ է լսում, որոնք իրեն կոչ են անում սպանել ԱՄՆ նախագահ Դոնալդ Թրամփին։ Այս մասին հայտնում է NBC News-ը՝ հղում անելով ԱՄՆ ներքին անվտանգության նախարարությանը։
Գերատեսչության տվյալներով՝ հինգշաբթի երեկոյան Գաղտնի ծառայության աշխատակիցների ուշադրությունը գրավել է մի տղամարդ, որը գտնվել է Սահմանադրության պողոտայում կայանված ավտոմեքենայում։ Ըստ դատական փաստաթղթերի՝ 26-ամյա Կրինոսը քնած է եղել կապույտ Ford F-150 պիկապում, որի առևանգման մասին ավելի վաղ հաղորդում էր ստացվել։
Սկզբում աշխատակիցները ստուգել են՝ արդյոք տղամարդն օգնության կարիք ունի։ Սակայն այնուհետև նա Google Translate-ի միջոցով հայտնել է, որ ձայներ է լսում, որոնք իրեն հրամայում են գալ Վաշինգտոն և սպանել Թրամփին։ Քննության տվյալներով՝ տղամարդը նաև հայտարարել է, որ ցանկանում է իշխանություններին հանձնել իր մոտ եղած զենքը։
Ավտոմեքենայի խուզարկության ժամանակ աշխատակիցները հայտնաբերել են AR-15 տիպի ավտոմատ հրացան, MAC-10 ատրճանակ-գնդացիր, Glock 43X ատրճանակ և ռազմամթերք։ Կրինոսի խոսքով՝ զենքը նա ձեռք է բերել մոտ մեկ ամիս առաջ, իսկ ինքը բնակվել է ավտոմեքենայում։
Տղամարդուն մեղադրանքներ են առաջադրվել զենքի ապօրինի կրման և փոխադրման, չգրանցված հրազենի և ռազմամթերքի պահման, ինչպես նաև տրանսպորտային միջոցի ապօրինի օգտագործման և գողացված գույք ստանալու համար։
Ներքին անվտանգության նախարարության տվյալներով՝ Կրինոսը 2024 թվականին ապօրինի մուտք է գործել ԱՄՆ, ձերբակալվել սահմանապահ ծառայության կողմից, ապա ազատ արձակվել։ Ուրբաթ օրվա դրությամբ նա շարունակում էր կալանքի տակ մնալ։ Դաշնային դատախազներն ուսումնասիրում են գործի նյութերը, իսկ դատական նիստը նշանակված է երկուշաբթի։
Գաղտնի ծառայության տնօրեն Շոն Քարանը հայտարարել է, որ այս դեպքն ընդգծում է պոտենցիալ վտանգավոր իրավիճակները կարգավորելու համար աշխատակիցների պատրաստվածության կարևորությունը։ Միաժամանակ նա մտահոգություն է հայտնել սպառնալիքների թվի աճի կապակցությամբ։