Սահմանադրության նոր տեքստը խաղաղությունը սպասարկելու համար է․ այսօր Ազգային ժողովում Կառավարության հետ հարցուպատասխանի ժամանակ ասաց Նիկոլ Փաշինյանը։
Ներկայացնում ենք Փաշինյանի հայտարարությունները՝ կետերով․
- TRIPP նախագծի իրագործման գործնական փուլ ենք մտնում։ Եվ այդ փուլի կարևոր հանգրվան է լինելու մասնավորապես հարավային հատվածում սահմանային այնքան տարածքի սահմանազատումն ու սահմանագծումը, որոնք անհրաժեշտ են տրանսպորտային հաղորդակցությունների՝ ճանապարհ, խողովակաշար, երկաթուղի, կառուցման համար։
- ՀՀ-ն մենք ձեր սարքած թակարդից հանել ենք․ Փաշինյանը՝ ընդդիմությանը։
- Ինչի՞ եք դուք պաշտպանում այս Սահմանադրությունը, որովհետև այս Սահմանադրությունն օլիգարխիայի, մարիոնետային, կոռումպացված դատական ու պետական համակարգի սահմանադրություն ա, ժողովրդի իշխանությունն արհամարհող սահմանադրություն ա, ընտրակեղծիքների ու ընտրակեղծարարների սահմանադրություն ա։
- Ձեր ուզածը ի՞նչ ա, որ խաղաղություն չլինի՛, որովհետև պիտի պատերա՛զմ լինի, որ դուք զինվորի հացը գողանաք ու միլիարդներ վաստակեք, որ դուք բանակից փախածներով հիմա վայնասուն բարձրացնեք։
- Ձեր պատասխանատվության ժամը եկել ա, և դուք հերթով ձեր տեղը գտնում եք ինքնիշխան ՀՀ բանտախցերում։
- Մենք Սյունիքից երբեք դիրքեր հետ չենք քաշել։
- Մենք ունենք գետեր, որոնք Հայաստանի տարածքից մտնում են Ադրբեջանի տարածք, հետո նորից մտնում են Հայաստանի տարածք: Դրանք ընդհանուր գետեր են, և մենք պետք է հասկանանք՝ ինչ կանոններով ենք այդ ջրային ռեսուրսները կառավարելու։
- Սահմանադրության նոր տեքստը խաղաղությունը սպասարկելու համար է։ Նոր Սահմանադրությանը կողմ քվեարկելով՝ քաղաքացին հարգանքի տուրք է մատուցելու նահատակներին։
- Իմ համոզմունքն է, որ հանրաքվեի արդյունքներով ՀՀ քաղաքացիների ճնշող մեծամասնությունը գնալու է և կողմ է քվեարկելու նոր սահմանադրությանը։