Վերջին շրջանում տարբեր հրապարակումներում և սոցիալական ցանցերում շրջանառվում են Արարատ Միրզոյան-Գոհար Աբաջյան զույգի նոր ձեռքբերումների մասին տեղեկություններ, ըստ որոնց՝ վերջիններս Շինարարների 14/1 հասցեում գտնվող նորակառույց բնակելի համալիրում անշարժ գույք են ձեռք բերել։
Պարզվում է՝ բացի շքեղ առանձնատնից, Միրզոյաններին այսուհետ պատկանում է նաև նորակառույցի ամբողջական մեկ հարկ (ըստ փաստաթղթի՝ 39-40 համարի բնակարանները)։
Այսպես․ արտգործնախարար Արարատ Միրզոյանի տարեկան հայտարարագրերը ցույց են տալիս ոչ միայն Միրզոյանի քաղաքական, այլև սոցիալական ճկուն վերելքները։ Ակնհայտ է, որ «թավիշից» հետո Միրզոյանի և կնոջ՝ Գոհար Աբաջյանի ունեցվածքը զգալի փոփոխությունների է ենթարկվել։
Հիշեցնենք, որ 2017 թվականի ապրիլի 2-ին «Ելք» կուսակցությունների դաշինքով Ազգային ժողովի պատգամավոր ընտրված ՔՊ-ական Արարատ Միրզոյանը թավշյա հեղափոխությունից» հետո նշանակվեց առաջին փոխվարչապետ։ Ավելի ուշ նա կրկին ստանձնեց պատգամավորական մանդատը, ապա նաև իշխանական մեծամասնության՝ ՔՊ-ականների կողմից ընտրվեց ԱԺ նախագահ, իսկ 2021 թվականից զբաղեցնում է Արտաքին գործերի նախարարի պաշտոնը։ 2018-ին Միրզոյանը գնել էր բնակարան Երևանում 49.7 մլն դրամով։
Ավելի ուշ՝ 2021-ին, նա 34.7 միլիոն դրամով վաճառել է Շենգավիթում գտնվող իր բնակարանը։ 2019 թվականին Գոհար Աբաջյանը 6.2 միլիոն դրամով ձեռք է բերել Kia Sportage մակնիշի ավտոմեքենա։
«Հեղափոխությունից» մեկ տարի անց Միրզոյանն անդրադարձել էր ձեռք բերված ունեցվածքին՝ նշելով․ «Կինս վարկով մեքենա է ձեռք բերել։ Չեմ հիշում` դա այն ժամանակ էր, երբ զբաղեցնում էի առաջին փոխվարչապետի պաշտոնը, թե երբ արդեն դարձա խոսնակ։
Ունեի մեկ սենյականոց բնակարան, որը վաճառել ենք և այդ գումարն օգտագործել ենք որպես կանխավճար ու հիփոթեքով ձեռք բերել ավելի մեծ բնակարան»։
Հանրային դաշտում հաճախ են հիշատակվում Արարատ Միրզոյանի՝ նախկինում արած այս և նմանատիպ այլ հայտարարությունները։
Հիշեցնենք՝ Փաշինյանն ասել էր, որ իրենց տան լվացքի մեքենայի վարկը մինչև հիմա չեն մարել, իսկ Արարատ Միրզոյանն էլ նշել էր․ «Գնացի հեռուստացույց ապառիկով վերցնեմ, չտվեցին, հարկադիրը կալանք էր դրել իմ հաշվի վրա»։
2022 թվականին արդեն պատկերը այլ էր, ըստ մամուլի զույգը 112 միլիոն դրամով (մոտ 280,000 դոլար) շքեղ առանձնատուն է գնել Կոտայքի մարզի Քասախ գյուղում։
Տունն ունի 288 քմ մակերես, իսկ հողամասը՝ 951 քմ։ Միրզոյանի կարիերայի աճը աննախադեպ է։ Այն հաճախ հակադրվում է նրա ներկայիս պաշտոնական կարգավիճակին և գույքային հայտարարագրերում արտացոլված տվյալներին՝ առաջ բերելով ունեցվածքի ձևավորման արագության վերաբերյալ հարցեր։
Հիշեցնենք՝ Oragir.News-ը բարձրաստիճան պաշտոնյաների և նրանց ընտանիքի անդամների հայտարարագրերի ուսումնասիրությունների շարքում իր ընթերցողներին էր ներկայացրել Արարատ Միրզոյանի և նրա կնոջ՝ Գոհար Աբաջյանի հայտարարագրերը, որի արդյունքում պարզ էր դարձել, որ 2018 թվականի իշխանափոխությունը չի շրջանցել նաև Արարատ Միրզոյան-Գոհար Աբաջյան զույգին։ Ըստ ուսումնասիրությունների վերջիններս «հեղափոխությունից» հետո դարձել են դրամային միլիոնատերեր, միանգամից 2 անշարժ գույք գնել։ Ի դեպ՝ նույն Արարատ Միզոյանը մի առիթով էլ հայտարարել էր, որ այնքան վատ է եղել սոցիալական վիճակը, որ փոշեկուլը ստիպված է եղել վարկով գնել։
Oragir.News-ը մեկ այլ հրապարակմամբ էլ հայտնել էր, որ ԱԳ նախարար Արարատ Միրզոյանի կինը՝ Գոհար Աբաջյանը 2025 թվականին նշանակվել է «Ներդրումների աջակցման կենտրոն» հիմնադրամի տնօրեն։ Մինչ այդ նա աշխատում էր մասնավոր սեկտորում («ՎՕԼՕ» ՍՊԸ), որտեղից 2020-ին ստացել էր շուրջ 9.8 մլն դրամի աշխատավարձ։ Այդ ժամանակ ընդդիմախոսները հարց էին բարձրացնում՝ արդյոք խնդրահարույց չէ՞, որ բարձրաստիճան պաշտոնյայի կինը նշանակվել է այդ պաշտոնում։
Զարմանալի, միևնույն ժամանակ խնդրահարույց է, որ հասարակ կենցաղային իր անգամ կանխիկ գնել չկարողացող ընտանիքը կարճ ժամանակում ձևավորում է բազմամիլիոնանոց կարողություն՝ ձեռք բերելով նորակառույց բնակարաններ, ավտոմեքենաներ և շքեղ առանձնատուն։ Այս կտրուկ փոփոխությունը ոչ միայն հակասում է նախկինում հնչեցված հայտարարություններին, այլև առաջացնում է հիմնավոր հարցեր՝ եկամուտների աղբյուրների թափանցիկության, գույքի կուտակման արագության և հայտարարագրված տվյալների ամբողջականության վերաբերյալ։
Հանրությունը հաճախ սիրում է զուգահեռներ անցկացնել նախկինների և ներկաների միջև՝ համեմատելով նրանց կողմից կուտակված հարստությունը, կամ իրենց խոսքով՝ «թալանվածը», և գուցե այս մոտեցումն ինչ-որ չափով արդարացված է։ Սակայն կարևոր է մի բան հստակ ֆիքսել․ եթե նախկինները հարստանում էին գոնե տարիների ընթացքում՝ աստիճանաբար, ապա ներկա իշխանության պարագայում այդ գործընթացը, ըստ քննադատների, տեղի է ունենում ամիսների ընթացքում։
Հասմիկ Մովսիսյան