Նպաստս չեն վերականգնում, ինձ դրել են «տուպիկի» մեջ․ միայնակ մայրն անորոշության մեջ է

Միասնական սոցիալական ծառայության Արմավիրի տարածքային կենտրոնը հրաժարվել է Արմավիր քաղաքի բնակիչ, միայնակ մոր կարգավիճակ ունեցող Անի Ալվանդյանին խոստացված նպաստը վերականգնել։

Հիշեցնենք՝ Ալվանդյանի երեխան, որպես միակողմանի ծնողազուրկ, ստանում էր նպաստ, որը 2025 թվականի հոկտեմբերից դադարեցվել էր։

Oragir.News-ը դեռ ամիսներ առաջ անդրադարձել էր այդ խնդրին` ակնկալելով Աշխատանքի և սոցիալական հարցերի նախարարության միջամտությունն ու արդարացի լուծումը։ Քաղաքացին պատմում է, որ երեխայի խնամքի նպաստը, որը նա օրենքով ստանում էր երեխայի ծնունդից ի վեր, դադարեցվել է այն բանից հետո, երբ հերթական փաստաթղթային թարմացման ժամանակ աշխատողի ցուցումով եկամուտ է նշել։

«Աշխատողն ասաց՝ կա՛մ մեր առաջարկած աշխատանքը պետք է ընդունեք, կա՛մ էլ այս թղթի մեջ եկամուտի չափ գրեք։ Ասացի՝ ինձ ձեր առաջարկած աշխատանքը ձեռք չի տալիս, որովհետև ես չեմ կարող հիմնական աշխատել, քանի որ իմ բալիկն իմ խնամքի տակ է։ Ես գնում եմ, տներ եմ մաքրում՝ երեխային էլ հետս տանում եմ։ Միևնույն է, այդ աշխատողը գրել տվեց եկամուտ՝ 50 հազար դրամ, որից հետո, հոկտեմբերից նպաստը կտրեցին»,- ասում է նա։

Oragir.News-ին Սոցապ նախարարությունից հայտնել էին, որ հարցը կվերանայվի 2026 թվականի մարտ ամսից, սակայն, ինչպես օրերս տեղեկացանք, դեռևս ոչինչ չի արվել, ու միայնակ մոր նպաստը չի վերականգնվել։ «Ես հրաժարվում եմ եռամսյակային օգնությունից, ես ուզում եմ նախորդի պես դիմում գրել՝ առանց եկամուտ նշելու, որովհետև իմ միավորները բավարարում են, որպեսզի իմ երեխային օրենքով ամենամսյա նպաստ հասնի»,- ասում է կինը՝ հավելելով, որ իրեն թույլ չեն տալիս նոր դիմում գրել։

Քաղաքացին պնդում է, որ նախկինում եկամուտի նշումը կատարվել է սոցիալական աշխատողի խորհրդով, և այդ հանգամանքը դարձել է իրեն նպաստից զրկելու պատճառ։ «Ես մեղավոր չեմ, որ աշխատողն ինձ դրել է տուպիկի առաջ ու ասել՝ սենց նշի։

Հիմա չգիտեմ՝ ինչ անեմ, ընկել եմ կրակը»,- ասում է նա։ Վերջինիս խոսքով՝ իր դեպքը բացառություն չէ, քանի որ իր տեղեկություննրով՝ այլ քաղաքացիների նույնպես տարբեր պատճառաբանություններով զրկել են թե նպաստներից, թե՛ թոշակից և թե՛ տարբեր սոցիալական օգնություններից։

Ալվանդյանը նշում է, որ ունի միայնակ մոր կարգավիճակը հաստատող փաստաթուղթ և այդ փաստաթղթերը ներկայացրել է են համապատասխան մարմիններին։

Անի Ալվանդյանը անորոշության մեջ է, կարո՞ղ է նոր դիմում ներկայացնել, թե՞ ոչ։ Մինչ այս պահը իրեն մերժել են՝ առաջարկելով միայն եռամսյակային օգնությունը, ինչը բավարար չէ երեխայի ուսման, կենցաղի և այլ խնդիրները լուծելու համար։ Նա տեղեկացրեց, որ նաև նամակ է գրել նախարար Արսեն Թորոսյանին, հանգամանորեն ներկայացրել իր խնդիրը, սակայն դեռևս պատասխան չի ստացել։