Նոր Հայաստանում «կոռուպցիայի դեմ պայքարի» մասին բարձրաձայն հայտարարությունները և գործող իշխանությունների հռչակած՝ «օրենքի առաջ բոլորի հավասարության» սկզբունքը կարծես՝ շարունակում է բախվել իրականությանը, իսկ ընտրովի արդարադատության մասին խոսակցությունները նոր թափ են ստանում։ Խոսքը վերաբերում է վարչապետի ընտանիքի հետ կապ ունեցող անձանցից մեկին՝ Աննա Հակոբյանի խորթ մորաքրոջ թոռ Ռաֆիկ Մաշադյանին։
Փաստաթղթային տվյալների ուսումնասիրությունը ցույց է տալիս, որ Մաշադյանի ընտանիքի անունով տարբեր տարիներին գրանցվել են մի շարք ընկերություններ, այդ թվում՝ հիդրոէլեկտրակայաններ շահագործող ՍՊԸ-ներ։ Առանձնահատուկ ուշադրության արժանի է այն հանգամանքը, որ այդ ակտիվների ձևավորումը տեղի է ունեցել այն ժամանակահատվածում, երբ Մաշադյանը զբաղեցրել է պետական պաշտոններ (2001–2013 թվականներին), այդ թվում՝ ՊԵԿ համակարգում։
Փաստաթղթերը վկայում են, որ Ռաֆիկ Մաշադյանի պաշտոնավարման տարիներին նրա կնոջ անունով գրանցվել են ՀԷԿ-եր շահագործող ընկերություններ։ Այս հանգամանքը ողջամիտ հարցեր է առաջացնում՝ արդյոք չի՞ եղել շահերի բախում, և պաշտոնատար անձը ներգրավված չի՞ եղել ձեռնարկատիրական գործունեության մեջ։
Հարկ է նշել, որ օրենսդրությունը հստակ սահմանափակումներ է դնում պետական պաշտոնյաների համար՝ ձեռնարկատիրական գործունեության մասով։ Սակայն նման դեպքերում հաճախ կիրառվում է նույն սխեման՝ ակտիվները ձևակերպվում են ընտանիքի անդամների անունով։
Հատկանշական է նաև, որ խոսքը մեկ ընկերության մասին չէ։ Տվյալների ուսումնասիրությունը ցույց է տալիս բազմակի ներգրավվածություն նույն ոլորտում՝ էներգետիկայում, որը համարվում է բարձր եկամտաբեր ոլորտ։
Այս ամենի ֆոնին առավել անհասկանալի է իրավապահ մարմինների լռությունը․ ո՛չ պարզաբանումներ, ո՛չ ուսումնասիրություններ, ո՛չ էլ հրապարակային գնահատականներ։ Սա այն դեպքում, երբ իշխանությունը բազմիցս հայտարարել է «զրո հանդուրժողականություն կոռուպցիայի նկատմամբ» սկզբունքի մասին։
Ստացվում է՝ Հայաստանում շարունակում է գործել հին, բայց լավ ծանոթ սկզբունքը՝ եթե «յուրային» ես՝ հարցեր չեն տրվում։
Հիշեցնենք՝ Աննա Հակոբյանի և Ռաֆիկ Մաշադյանի միջև առկա բարեկամական կապը և դրա շուրջ հյուսված պատմությունները հանրային քննարկման առարկա դարձան 2019 թվականին։ Ի դեպ, ըստ ԶԼՄ տարբեր հրապարակումների՝ Մաշադյանը ՊԵԿ կոռումպացված գործիչներից մեկն է եղել։
Մամուլում լուրեր տարածվեցին, որ Ռաֆիկ Մաշադյանի պաշտոնական վերելքը պայմանավորված է Աննա Հակոբյանի հետ ունեցած բարեկամությամբ։ Ի պատասխան՝ Աննա Հակոբյանը պարզաբանեց, որ նա իր խորթ մորաքրոջ թոռն է, որին վերջին անգամ տեսել է 2010 թվականին։
Հավելենք, որ Մաշադյանի որդին՝ Հարություն Մաշադյանը, ևս զբաղեցրել է բարձր պաշտոններ (օրինակ՝ Երևանի կայազորի զինվորական դատախազության ավագ դատախազ)։ Մամուլը հաճախ է անդրադարձել Մաշադյանների ընտանիքի տպավորիչ ունեցվածքին և եկամուտներին։