ԵՐԵՎԱՆ, 5 մայիսի․/ԱՌԿԱ/․ Հայաստանի վարկային պորտֆելը վերջին երեք տարիներին տարեկան աճում է շուրջ 20%-ով, երեքշաբթի ԱԺ նիստում հայտարարել է ՀՀ Կենտրոնական բանկի նախագահ Մարտին Գալստյանը:
«Եթե դիտարկենք կուտակային առումով, տեսնում ենք բարձր պահանջարկ: Պահանջարկի նման մակարդակի պայմաններում դժվար է պատկերացնել գների նվազում», – նշել է Գալստյանը:
Նրա խոսքով՝ բանկային համակարգում ներդրվել են կապիտալի բուֆերներ, ինչի հետևանքով բանկերի համար աճել է ռեսուրսների արժեքը:
Գալստյանը նաև հայտնել է, որ Հայաստանում սպառողական և հիփոթեքային վարկերը ներկայումս տրամադրվում են հիմնականում հայկական դրամով՝ առանց դոլարային բաղադրիչի:
Ըստ նրա՝ 2025 թվականի ընթացքում հիփոթեքային վարկավորման շուկայում շուրջ 9 հազար վարկերի դրույքաչափերը նվազել են, 3 հազարինը՝ աճել, իսկ մոտ 60 հազար վարկ մնացել է անփոփոխ: