ԵՐԵՎԱՆ, 6 մայիսի․/ԱՌԿԱ/․ Հայաստանի բանկային համակարգի միջոցով արտերկրից ֆիզիկական անձանց անունով ստացված անդրսահմանային փոխանցումների զուտ ներհոսքը 2026 թվականի հունվար-մարտին կազմել է 458,2 մլն դոլար՝ 2025 թվականի հունվար-մարտի 143,7 մլն դոլարի դիմաց, նշվում է հանրապետության Կենտրոնական բանկի հաշվետվության մեջ։
Այսպիսով, տվյալ ցուցանիշը տարեկան կտրվածքով աճել է 3,19 անգամ։
Ընդ որում, միայն մարտին դրամական փոխանցումների զուտ ներհոսքը կազմել է 155,2 մլն դոլար՝ նախորդ տարվա մարտի 56,2 մլն դոլարի դիմաց։
Հայաստանի բանկային համակարգի միջոցով արտերկրից ֆիզիկական անձանց անունով ստացված անդրսահմանային փոխանցումների ներհոսքն այս տարվա առաջին եռամսյակում կազմել է 1,47 մլրդ դոլար՝ նախորդ տարվա առաջին եռամսյակի 1,27 մլրդ դոլարի դիմաց։
Դեպի Հայաստան փոխանցումների առաջատարների թվում են Ռուսաստանը՝ 945,3 մլն դոլարով և ԱՄՆ-ը՝ 187,4 մլն դոլարով։ Ընդ որում, Ռուսաստանը և ԱՄՆ-ը առաջատար են եղել դեպի Հայաստան փոխանցումներով նաև 2025 թվականի հաշվետու ժամանակաշրջանի արդյունքներով (համապատասխանաբար՝ 819,5 մլն դոլար և 157,7 մլն դոլար):
Միաժամանակ, ՀՀ բանկային համակարգի միջոցով ֆիզիկական անձանց կողմից Հայաստանից արտերկիր կատարված փոխանցումների արտահոսքը 2026 թվականի առաջին երեք ամիսներին կազմել է 1,01 մլրդ դոլար՝ 2025 թվականի նույն ժամանակահատվածի 1,13 մլրդ դոլարի դիմաց:
Հայաստանից արտերկիր կատարված փոխանցումներով հաշվետու ամիսներին առաջատար են եղել ԱՄՆ-ը (198,7 մլն դոլար) և ԱՄԷ-ն (143,4 մլն դոլար)։ 2025 թվականի առաջին եռամսյակում առաջատարներն էին Շվեյցարիան (289,6 մլն դոլար) և ԱՄԷ-ն (170 մլն դոլար)։