Ֆրանսիայի նախագահ Էմանուել Մակրոնը բանակցություններ է վարել Իրանի առաջնորդ Մասուդ Փեզեշքիանի հետ և առաջարկել է դիտարկել Ֆրանսիայի և Մեծ Բրիտանիայի նախաձեռնությունը՝ Հորմուզի նեղուցում նավագնացության անվտանգության ապահովման միջազգային առաքելություն ստեղծելու վերաբերյալ:
Ըստ Reuters-ի տվյալների՝ ՝ ծովային երթուղիների պաշտպանության հնարավոր գործողությանը նախապատրաստվելու շրջանակում ֆրանսիական ավիակիր խումբը «Շառլ դը Գոլի» գլխավորությամբ, ուղևորվում է դեպի Կարմիր ծով:
Մակրոնը հայտարարել է, որ բազմազգ առաքելությունը կարող է օգնել վերականգնել նավատերերի և ապահովագրական ընկերությունների վստահությունը, ինչպես նաև անկախ բնույթ կկրի և կախված չի լինի հակամարտող կողմերից: Նա հավելել է, որ մտադիր է նախաձեռնությունը քննարկել ԱՄՆ նախագահ Դոնալդ Թրամփի հետ:
Ֆրանսիայի առաջնորդը նշել է, որ նեղուցում իրավիճակի կայունացումը կարող է նպաստել Իրանի միջուկային ծրագրի և տարածաշրջանային անվտանգության հարցերի շուրջ բանակցությունների առաջընթացին, միաժամանակ կոչ է արել ապահովել նավագնացության ազատությունը:
Ավելի վաղ Մեծ Բրիտանիան և Ֆրանսիան հայտարարել էին նմանատիպ առաքելություն գլխավորելու պատրաստակամության մասին, իսկ Լոնդոնում ավելի քան 30 երկրների ռազմական ներկայացուցիչների մասնակցությամբ համաժողով էր տեղի ունեցել:
Տարածաշրջանում լարվածության սրացման պայմաններում նավագնացությունը Հորմուզի նեղուցով գրեթե դադարել է, ինչն արդեն հանգեցրել է էներգակիրների համաշխարհային գների աճին: