Չինացի փորձագետները կարծում են, որ ԱՄՆ-ը շահագրգռված է Չինաստանի հետ արհեստական բանականության ոլորտում համագործակցության զարգացմամբ՝ չնայած երկրների միջև շարունակվող ռազմավարական մրցակցությանը։ Այս մասին գրել է Global Times-ը՝ ԱՄՆ նախագահ Դոնալդ Թրամփի Չինաստան այցի նախապատրաստման ֆոնին։
Չինաստանի արտաքին գործերի համալսարանի պրոֆեսոր Լի Հայդունը հայտնել է, որ Վաշինգտոնը ձգտում է Պեկինի հետ համագործակցության՝ ԱԲ-ի համաշխարհային կարգավորման կանոնների ձևավորման և այս ոլորտում մրցակցության անվերահսկելիությունը կանխելու հարցերում։
Նրա խոսքով՝ ԱՄՆ-ը արհեստական բանականությունը դիտարկում է որպես Չինաստանի հետ ռազմավարական մրցակցության առանցքային ուղղություն, սակայն միաժամանակ խոսում է համագործակցության անհրաժեշտության մասին։ Փորձագետն ընդգծել է, որ «երկակի ստանդարտների» մոտեցումը բարդացնում է երկրների միջև երկխոսությունը։
Լի Հայդունը նաև նշել է ամերիկյան սենատորների պատվիրակության այցի կարևորությունը Պեկին, որտեղ հանդիպումներ են կայացել Չինաստանի ԱԳ նախարար Վան Իի և Պետխորհրդի վարչապետ Լի Ցյանի հետ։ Նրա կարծիքով՝ նման շփումները օգնում են կողմերին ավելի լավ հասկանալ միմյանց առաջնահերթությունները և կարգավորել տարաձայնությունները։
Իր հերթին, SenseTime ընկերության ԱԲ հետազոտությունների ինստիտուտի նախկին դեկան Տյան Ֆենը հայտնել է, որ չինական արհեստական բանականության մոդելները, այդ թվում՝ DeepSeek-ը, արդեն մոտեցել են առաջատար ամերիկյան մշակումների մակարդակին՝ չնայած ԱՄՆ արտահանման սահմանափակումներին։
Նա ընդգծել է, որ Չինաստանը հանդես է գալիս ԱԲ կարգավորման շուրջ միջազգային երկխոսության օգտին՝ հավասարության և փոխադարձ հարգանքի հիման վրա, ինչպես նաև դեմ է համաշխարհային կանոնների մոնոպոլացմանը առանձին պետությունների կողմից։