ԱՄՆ առողջապահության նախարարության Հիվանդությունների վերահսկման և կանխարգելման կենտրոնները (CDC) MV Hondius զբոսանավում հանտավիրուսի բռնկմանը տվել են արտակարգ արձագանքի երրորդ՝ ամենացածր մակարդակը։ Այս մասին հայտնել է ABC News-ը՝ հղում կատարելով աղբյուրներին։
Հեռուստաալիքի տվյալներով՝ ԱՄՆ առողջապահական մարմինները շարունակում են ուշադիր հետևել իրավիճակին, սակայն բնակչության համար ռիսկը գնահատում են որպես ցածր։ Անհրաժեշտության դեպքում բռնկմանն արձագանքելու համար ժամանակավորապես կարող են ներգրավվել CDC-ի համաճարակաբաններ, գիտնականներ և բժիշկներ։
Երեք շաբաթ առաջ MV Hondius նավը Արգենտինայի Ուշուայա քաղաքից ուղևորվել էր Կանարյան կղզիներ։ Նավում գտնվում է շուրջ 150 մարդ, հիմնականում ԱՄՆ, Մեծ Բրիտանիայի, Իսպանիայի և Նիդեռլանդների քաղաքացիներ։ Անձնակազմի շրջանում կա նաև Ռուսաստանի մեկ քաղաքացի։
Հանտավիրուսները մարդուն փոխանցվում են փոքր կաթնասուններից և ծանր դեպքերում կարող են առաջացնել թոքերի վնասում, սրտային անբավարարություն և հեմոռագիկ տենդ։