«Լրագրողներ առանց սահմանների» միջազգային իրավապաշտպան կազմակերպությունը շաբաթ օրը դատապարտել է Նիգերում ինը ֆրանսիական լրատվամիջոցների գործունեության կասեցումը, լրատվամիջոցները մեղադրվում են «հասարակական կարգին և ազգային անվտանգությանը սպառնալիք ներկայացնելու» մեջ, հաղորդել է Associated Press-ը։
«Լրագրողներ առանց սահմանների» կազմակերպությունն այդ մեղադրանքներն անվանել է շինծու։
Իր հայտարարության մեջ կազմակերպությունը դատապարտել է «մամուլի ազատությունը ճնշելու համակարգված ռազմավարությունը» և կոչ է արել չեղարկել ընդունված որոշումը։
Հաղորդակցությունների ազգային օբսերվատորիան՝ արևմտաաֆրիկյան երկրի լրատվամիջոցները կարգավորող մարմինը, ուրբաթ ուշ երեկոյան տարածած հայտարարության մեջ նշել է, որ France 24-ի, RFI-ի, France Afrique Media-ի, LSI Africa-ի, AFP-ի, TV5 Monde-ի, TF1 Info-ի, Jeune Afrique-ի և Mediapart-ի գործունեության կասեցումը անհրաժեշտ էր «խաղաղության, սոցիալական համախմբվածության և ինստիտուտների կայունության պահպանման համար»։
Տուժած ԶԼՄ-ները մեղադրվել են «այնպիսի կոնտենտի հեռարձակման մեջ, որը կարող է լրջորեն սպառնալ հասարակական կարգին» և թուլացնել տարածաշրջանում գործող պաշտպանության և անվտանգության ուժերի մարտական ոգին։
Նիգերը, ինչպես նաև հարևան Մալին և Բուրկինա Ֆասոն, կառավարվում են ռազմական առաջնորդների կողմից, որոնք իշխանությունը զավթել են ուժով՝ խոստանալով ավելի մեծ անվտանգություն ապահովել քաղաքացիների համար։ Իշխանության զավթումից հետո խունտաները խզել են կապերը Ֆրանսիայի և այլ արևմտյան տերությունների հետ, ստեղծել իրենց սեփական անվտանգության դաշինքը և դիմել Ռուսաստանին՝ զինվորական աջակցություն ստանալու համար՝ ծայրահեղական խռովությունների դեմ պայքարում։