«Հայրենիք» կուսակցության անդամ, քաղբանտարկյալ Խաչիկ Գալստյանի քրեական գործը մուտքագրվել է Հակակոռուպցիոն դատարան։ Այս մասին Oragir.News-ը տեղեկանում է «Դատալեքս» տեղեկատվական համակարգից։
Oragir.News-ի հետ զրույցում Խաչիկ Գալստյանի պաշտպան Արսեն Բաբայանը նշեց՝ տեղյակ չէ, որ գործը հասել է դատարան։
«Ես մեղադրական եզրակացությունը ստացել եմ, բայց որ մուտք է գործել դատարան, դրա մասին տեղյակ չեմ»,- ասաց նա։
Մեկնաբանելով Խաչիկ Գալստյանի նկատմամբ առաջադրված մեղադրանքը՝ նա նշեց, որ Գալստյանը ոչ մի հանցավոր արարք չի կատարել, ինչը նշանակում է, որ պետք է արդարացվի։
Նշենք, որ Խաչիկ Գալստյանի գործը մակագրվել է դատավոր Վարդգես Արայիկ Սարգսյանին։ Ըստ մեղադրանքի՝ Վաղարշապատում «Հայրենիք» կուսակցության պատասխանատու Արամ Քոչարյանը, նախնական համաձայնության գալով «Հայրենիք» կուսակցության տարածքային շտաբի պետ Խաչիկ Գալստյանի և ինքնությունները դեռևս չպարզված այլ անձանց հետ, ներգրավված է եղել ենթադրյալ ընտրակաշառքի առաջարկման գործընթացում։
Մասնավորապես, ըստ քրեական գործի նյութերի, խոսքը վերաբերում է Արմավիրի մարզի Վաղարշապատ համայնքում 2025 թվականի նոյեմբերի 16-ին կայանալիք ավագանու ընտրություններին։
Քննության տվյալներով՝ նշված անձինք, տարբեր քաղաքացիների, այդ թվում՝ այլ քաղաքական ուժերի համակիրների ներգրավմամբ, առաջարկել կամ խոստացել են ընտրակաշառք՝ «Հայրենիք» կուսակցության օգտին քվեարկելու նպատակով։
Արամ Քոչարյանին մեղադրանք է առաջադրվել խմբով, նախնական համաձայնությամբ ընտրակաշառք առաջարկելու համար՝ ՀՀ քրեական օրենսգրքով նախատեսված համապատասխան հոդվածով։
Հարկ է նշել, որ Խաչիկ Գալստյանի պաշտպանական կողմը կտրականապես հերքում է առաջադրված մեղադրանքը։
Գալստյանի պաշտպան Արսեն Բաբայանը բազմիցս հայտարարել է, որ իր պաշտպանյալը որևէ հանցավոր արարք չի կատարել, և նրան կալանքի տակ պահելու համար որևէ իրավական հիմք չկա։