Մայիսի 14-15-ը Պեկինում կայանալիք գագաթնաժողովի ընթացքում ԱՄՆ նախագահ Դոնալդ Թրամփն ու Չինաստանի նախագահ Սի Ծինփինը կքննարկեն Իրանի դեմ ԱՄՆ-ի և Իսրայելի պատերազմը, ինչպես նաև առևտրային հարաբերությունները, Թայվանի շուրջ ստեղծված իրավիճակն ու լարվածության մյուս հիմնական օջախները։ Այս մասին հայտնում է Reuters գործակալությունը։
Ամերիկյան բարձրաստիճան պաշտոնյայի փոխանցմամբ՝ հազվագյուտ մետաղների վերաբերյալ ԱՄՆ-ի և Չինաստանի միջև գործող համաձայնագիրն ուժի մեջ է և կարող է երկարաձգվել։ Նշվում է, որ հարմար պահին կլինի նաև պաշտոնական հայտարարություն։
Նա նշել է, որ այս հարցի շուրջ բանակցությունները շարունակվում են, սակայն դեռևս պարզ չէ՝ արդյոք համաձայնագիրը կերկարաձգվի, թե ոչ։ Նա վստահություն է հայտնել, որ ցանկացած որոշման մասին կհայտարարվի ճիշտ ժամանակին:
Հոդվածում նաև ընդգծվում է, որ Թրամփն ու Սին նախկինում պայմանավորվել են ժամանակավորապես դադարեցնել այն առևտրային պատերազմը, որի շրջանակում ԱՄՆ-ն բարձր մաքսատուրքեր էր սահմանել չինական ապրանքների նկատմամբ, իսկ Չինաստանը դիտարկում էր հազվագյուտ մետաղների համաշխարհային մատակարարումների սահմանափակման հարցը:
Նրանց վերջին հանդիպումը տեղի է ունեցել հոկտեմբերին՝ Հարավային Կորեայում: