ԱՄՆ փոխնախագահ Ջեյ Դի Վենսն ու պետքարտուղար Մարկո Ռուբիոն կարող են դառնալ նախագահ Դոնալդ Թրամփի հավանական հետնորդները պետության ղեկավարի պաշտոնում։ Թրամփն այս մասին հայտարարել է Սպիտակ տան Վարդերի այգում՝ Ոստիկանության շաբաթվա պատվին կազմակերպված ընթրիքի ժամանակ։
Նա նշել է, որ երկու պաշտոնյաներն էլ կարող են կազմել «երազանքի թիմ», սակայն չի հստակեցրել մանրամասները և չի շարունակել այդ միտքը։
«Ընտրություններում հիանալի կհնչեր՝ Ջեյ Դի և Մարկո։ Իդեալական թեկնածուներ են։ Ի դեպ, ես հավատում եմ, որ դա երազանքի թիմ է, բայց կան որոշ փոքրիկ նրբություններ», — ասել է նա։
Politico պարբերականը դեռ ապրիլի 24-ին հայտնել էր, որ Սպիտակ տանը լրջորեն դիտարկում են ԱՄՆ պետքարտուղար Մարկո Ռուբիոյի թեկնածությունը։ Նշվում է, որ 2016-ի անհաջող նախընտրական արշավից հետո քաղաքական գործչին համարում էին չափազանց ռազմատենչ և պահպանողական։ Սակայն Վենեսուելայի նախկին նախագահ Նիկոլաս Մադուրոյին իշխանությունից հեռացնելու նրա ջանքերն ու Թրամփի հանդեպ «անսասան հավատարմությունը» ամրապնդել են նրա դիրքերը ինչպես Սպիտակ տանը, այնպես էլ MAGA շարժման կողմնակիցների շրջանում։