ԵՐԵՎԱՆ, 12 մայիսի․/ԱՌԿԱ/․ ՎԶԵԲ-ը Հայաստանում խոշորագույն ներդրողներից մեկն է․ մինչ օրս բանկը ֆինանսավորել է ավելի քան 245 ծրագիր՝ շուրջ 3 միլիարդ եվրո գումարի չափով, որի ավելի քան 85 տոկոսն ուղղվել է մասնավոր հատվածին։ Այս մասին հայտարարել է Վերակառուցման և զարգացման եվրոպական բանկի Թուրքիայի և Կովկասի գծով գործադիր տնօրեն Էլիզաբետտա Ֆալչետտին «ԱՌԿԱ» գործակալությանը տված հարցազրույցում։
«Այս ծավալն արտացոլում է ինչպես Հայաստանի կարևորությունը մեզ համար, այնպես էլ երկրի՝ ներդրումները արդյունավետ օգտագործելու աճող կարողությունը», – ասել է նա։
Ֆալչետտիի խոսքով, Հայաստանում արդեն երկրորդ տարին անընդմեջ արձանագրում ենք ներդրումների ռեկորդային մակարդակ։
«2025 թվականին մեր ներդրումները գերազանցել են 2024 թվականի պատմական ռեկորդը՝ 396 միլիոն եվրոն, և հասել են 426 միլիոն եվրոյի՝ 26 ծրագրերի շրջանակում։ Այս կայուն դինամիկան արտացոլում է թե՛ ՎԶԵԲ-ի վստահությունը Հայաստանի տնտեսական ներուժի հանդեպ, թե՛ երկրի՝ ներդրումներն արդյունավետ ներգրավելու և օգտագործելու բարձր կարողությունը», – ընդգծել է նա։
Գործադիր տնօրենը նշել է, որ առաջիկայում բանկի ծրագրերի պորտֆելը մնում է ծավալուն։
«Մենք ևս մեկ հաջող տարի ենք ակնկալում՝ շարունակելով աջակցել մասնավոր հատվածի, կայուն ենթակառուցվածքների, մարդկային կապիտալի զարգացմանը և Հայաստանի տնտեսության դիմակայունությանը», – ասել է նա։
Այս համատեքստում Ֆալչետտին նշել է, որ տարածաշրջանային կապակցվածության ամրապնդումը դարձել է կարևորագույն ռազմավարական գերակայություն՝ հատկապես տրանսպորտի, էներգետիկայի և թվային ենթակառուցվածքների ոլորտներում։
«Այս ոլորտներն առանցքային դեր ունեն Հայաստանի երկարաժամկետ արտադրողականության, կայունության և սոցիալական համերաշխության ապահովման գործում», – պարզաբանել է նա։
Հարցազրույցի ամբողջական տարբերակին կարող եք ծանոթանալ հետևյալ հղումով։