«Բարսելոնան» պաշտոնական կայքում հայտարարություն է տարածել Մադրիդի «Ռեալի» նախագահ Ֆլորենտինո Պերեսի մամուլի ասուլիսից հետո։
Լրագրողների հետ զրույցում «սերուցքայինների» ղեկավարն անդրադարձել էր կապտանռնագույնների և Մրցավարների տեխնիկական կոմիտեի (CTA) նախկին փոխնախագահ Խոսե Մարիա Նեգրեյրայի համագործակցության կոռուպցիոն բնույթին։ Պերեսը նաև հայտնել էր, որ այս գործով համապատասխան փաստաթղթերն արդեն փոխանցվել են ՈւԵՖԱ-ին։
Այս առնչությամբ կատալոնական ակումբը հանդես է եկել պաշտոնական արձագանքով.
«Կապված Մադրիդի «Ռեալի» նախագահ Ֆլորենտինո Պերեսի հրավիրած մամուլի ասուլիսի հետ՝ հայտնում ենք, որ մեր իրավաբանական բաժինն ուշադիր ուսումնասիրում է նրա հայտարարություններն ու մեղադրանքները։
Ներկայումս դրանք վերլուծության փուլում են, և գնահատվում են մեր հետագա քայլերը։ Մենք լրացուցիչ տեղեկատվություն կտրամադրենք մեր դիրքորոշման և կայացվելիք որոշումների վերաբերյալ այն ժամանակ, երբ դա նպատակահարմար կլինի»,- ասված է ակումբի տարածած հաղորդագրության մեջ։