Ռուսաստանի ռազմական բարձրագույն հրամանատարությունը համոզել է նախագահ Վլադիմիր Պուտինին, որ ռուսական զորքերը կկարողանան ամբողջությամբ գրավել Դոնբասը մինչև աշուն։ Դրանից հետո Կրեմլի առաջնորդը մտադիր է խստացնել իր պահանջները ուկրաինական տարածքների վերաբերյալ։
Այս մասին գրում է Financial Times-ը՝ հղում է անելովՌուսաստանի առաջնորդի հետ կապ ունեցող երկու անանուն աղբյուրների, այս հարցին ծանոթ երկու այլ անձանց և ուկրաինական հետախուզության գնահատականներին։
Ըստ թերթի՝ Կրեմլի վերջնական նպատակը մնում է Կիևի և Օդեսայի վերահսկողությունը։
Պուտինը հույս ուներ համոզել Դոնալդ Թրամփին ստիպել Ուկրաինայի առաջնորդ Վլադիմիր Զելենսկիին զիջել Դոնեցկի շրջանի մնացած մասը՝ փոխհատուցելու համար առաջնագծում առաջխաղացման դանդաղումը։ Նա այս առաջարկը հնչեցրել է 2025 թվականի օգոստոսին Ալյասկայում կայացած գագաթնաժողովում։ Չնայած ԱՄՆ-ն քննարկել է այս տարբերակը, Թրամփը նման համաձայնագիր չի պարտադրել Ուկրաինային։
Մինչդեռ Կրեմլը նախկինում փորձում էր ստեղծել այն պատրանքը, որ դանդաղ, բայց անխուսափելիորեն «ճնշում է» Ուկրաինային, Պուտինի հռետորաբանությունն այժմ փոխվել է։
«Առաջիկայում Պուտինը պլանավորում է բարձրացնել ցանկացած հրադադարի գինը՝ ամրապնդելով Ռուսաստանի տարածքային պահանջները», – լրագրողներին ասել են երեք տեղեկացված աղբյուրներ։
FT-ի երկու կողմերի դիրքորոշումներին ծանոթ աղբյուրների համաձայն՝ և՛ Ռուսաստանը, և՛ Ուկրաինան ներկայումս ԱՄՆ-ի միջնորդությամբ խաղաղ բանակցությունների վերսկսման հնարավորությունները չափազանց ցածր են համարում՝ նույնիսկ Մերձավոր Արևելքում հակամարտության ավարտից հետո։
Ներկայումս Պուտինը կենտրոնացած է Ուկրաինայի որքան հնարավոր է շատ տարածք գրավելու և իր պահանջները հետագայում ընդլայնելու վրա։ Միևնույն ժամանակ, պաշտոնական Կիևը իրեն «ավելի քիչ խոցելի» է համարում ԱՄՆ-ի կողմից շտապ և անբարենպաստ գործարքի ճնշման նկատմամբ։ Դրան նպաստել է Ռուսաստանի առաջխաղացման դադարեցումը և թշնամու գծերի խորքում անօդաչու թռչող սարքերի հաջող հարվածները։
FT-ին տված մեկնաբանության մեջ ուկրաինացի մի պաշտոնյա նշել է, որ ԱՄՆ-ն «Ռուսաստանից ոչ մի առաջընթացի չի հասել» և որ «ամեն ինչ, ինչի շուրջ կարելի էր համաձայնության գալ, արդեն արվել է»։
Ըստ ուկրաինական լրատվամիջոցների՝ ԱՄՆ-ն, իբր, փորձում է առաջ մղել ժամանակավոր համաձայնագրի գաղափարը՝ Մոսկվային առաջարկելով մասնակի պատժամիջոցների մեղմացում՝ ռազմական գործողությունների դադարեցման դիմաց։ Կառավարական աղբյուրը հաստատել է նման նախաձեռնության գոյությունը, բայց պարզաբանել է, որ դրա հեղինակը (ամերիկյան, թե՞ ռուսական) մնում է անհայտ։ Հետախուզության տվյալներով՝ առաջարկը ծագել է Վաշինգտոնի և Մոսկվայի միջև ուղիղ շփումների ժամանակ։
Մայիսի 12-ին Դոնալդ Թրամփը հրապարակավ հայտարարեց, որ ինքն ու Պուտինը փոխըմբռնման չեն եկել Ուկրաինայի Դոնբասի նկատմամբ լիակատար վերահսկողություն հաստատելու՝ Ռուսաստանի պահանջների վերաբերյալ։