Արցախի փաստաբանների պալատի նախագահ Էրիկ Բեգլարյանի ֆեյսբուքյան գրառումը․ «Արցախի Հանրապետությունը, չնայած չճանաչված պետություն էր, այդուհանդերձ իր իրավական համակարգի շրջանակներում լիարժեքորեն ապահովել և պաշտպանել է ադրբեջանցի դիվերսանտներ Շահբազ Գուլիևի և Դիլհամ Ասկերովի իրավունքներն ու օրինական շահերը՝ համաձայն գործող դատավարական ընթացակարգերի։
Դիլհամ Ասկերովի իրավունքների և օրինական շահերի պաշտպանության ընթացքում ես, որպես նրա պաշտպան, սահմանված կարգով բողոքարկել եմ դատական ակտերը՝ սկզբում վերաքննիչ դատարանում, այնուհետև՝ գերագույն դատարանում, որից հետո իմ և Դիլհամ Ասկերովի կողմից համապատասխան բողոք է ներկայացվել նաև միջազգային դատական ատյան։
Ցավով եմ արձանագրում, որ Ադրբեջանը, ի տարբերություն Արցախի Հանրապետության, որը նույնիսկ չճանաչված կարգավիճակ ուներ, հանդիսանալով միջազգային հանրության կողմից ճանաչված պետություն, ակնհայտորեն խախտում է մեր հայրենակիցների իրավունքներն ու օրինական շահերը։ Բոլոր հնարավոր միջոցներով խոչընդոտվում է նրանց լիարժեք պաշտպանությունը՝ ներառյալ փաստաթղթերի կեղծման, դատական նյութերի թաքցման կամ անհասանելի դարձնելու դեպքերը, ինչը զգալիորեն բարդացնում է դատական ակտերի բողոքարկման բնականոն գործընթացը։
Այս ամենը հանդիսանում է մարդու իրավունքների կոպիտ խախտում։ Մենք, մեր կողմից, երբևէ նման վերաբերմունք չենք ցուցաբերել ադրբեջանցի դիվերսանտների նկատմամբ՝ ապահովելով նրանց նկատմամբ դատավարական բոլոր անհրաժեշտ երաշխիքները։ Թող ադրբեջանցի իրավապահ մարմինները հարցնեն Դիլհամ Ասկերովից և ուսումնասիրեն մեր փորձը՝ հասկանալու համար, թե ինչպես պետք է վերաբերվել մեղադրյալներին՝ գոնե որոշ չափով առաջնորդվելով մարդասիրական և իրավական սկզբունքներով։
Աշխարհը պետք է պատշաճ արձագանքի Բաքվի բանտերում ապօրինի պահվող մեր հայրենակիցների իրավունքների խախտումների վերաբերյալ բողոքներին»։