Իսրայելի վարչապետ Բենիամին Նեթանյահուն երկուշաբթի 24 ժամվա ընթացքում անվտանգության կաբինետի երկրորդ նիստն է անցկացրել՝ անվտանգության հարցերով նախորդ բարձր մակարդակի խորհրդակցությունից հետո։
Իսրայելցի պաշտոնյան i24NEWS-ին հայտնել է, որ «պատրաստվածության մակարդակը ծայրահեղ բարձր է՝ արդեն շաբաթվա վերջին պատերազմի հնարավոր վերսկսման սպասումով»։
Հրատապ նիստերի այս շարքը հաջորդել է կիրակի օրը ԱՄՆ նախագահ Դոնալդ Թրամփի հետ Նեթանյահուի ունեցած հեռախոսազրույցին։
Ըստ աղբյուրների՝ Թրամփն իսրայելցի վարչապետին պատմել է Չինաստան կատարած իր վերջին այցի մասին, սակայն զրույցը չի հանգեցրել հետագա գործողությունների վերաբերյալ որևէ հստակ որոշման։
Ինչպես նշվում է, Իսրայելն ու ԱՄՆ-ը շարունակում են ինտենսիվ համակարգումը և պատրաստվում են բոլոր հնարավոր սցենարներին։ Աղբյուրները ներկա պահը անվանում են պոտենցիալ «ճշմարտության պահ»։
Ըստ իսրայելցի պաշտոնյայի՝ Իսրայելում պահպանվում է «տագնապի բարձր մակարդակը»՝ սպասելով Իրանի հարցով հաջորդ քայլերի վերաբերյալ ԱՄՆ նախագահի որոշմանը։
Իրադարձությունների զարգացման տարբեր տարբերակների նախապատրաստությունները շարունակվում են, ներառյալ՝ մարտական գործողությունների վերսկսման սցենարը։
Նեթանյահուի հետ զրույցից հետո Թրամփը հրապարակում է արել Truth Social սոցիալական ցանցում, որտեղ Իրանին զգուշացրել է. «Իրանի համար ժամանակը սպառվում է, և նրանց համար ավելի լավ է արագ գործել, այլապես նրանցից ոչինչ չի մնա»։
Աղբյուրների տվյալներով՝ հենց Իրանում մարտական գործողությունների հնարավոր վերսկսման հարցն է եղել Թրամփի և Նեթանյահուի հեռախոսազրույցի առանցքային թեման։