Արաբական Միացյալ Էմիրությունների նախագահի խորհրդական Անվար Գարգաշը նախազգուշացրել է, որ Հորմուզի նեղուցի կարգավիճակը փոխելուն ուղղված Իրանի ցանկացած քայլ լուրջ համաշխարհային հետևանքներ կունենա, ներառյալ՝ Եվրոպայի համար, և վտանգավոր նախադեպ կստեղծի։
«Reuters» գործակալությանը տված հարցազրույցում Գարգաշը հայտարարել է, որ եվրոպական երկրները Հորմուզի նեղուցի նկատմամբ իրանական վերահսկողությունը պետք է դիտարկեն ոչ թե որպես հեռավոր խնդիր, այլ որպես մի հարց, որն ուղղակիորեն կապված է իրենց էներգետիկ և առևտրային անվտանգության հետ։
Նա նշել է նաև, որ Իրանի հետ պատերազմից հետո ԱՄՆ-ը սկսել է «ավելի կենտրոնական դեր խաղալ» Պարսից ծոցի յուրաքանչյուր երկրի հաշվարկներում։
Գարգաշը հավելել է, որ հավանականությունը, որ ԱՄՆ-ն ու Իրանը համաձայնություն ձեռք կբերեն, որը կբացի Հորմուզի նեղուցը, կազմում է «50-ը 50-ի»։ «Իրանցի պաշտոնյաները տարիների ընթացքում բազմաթիվ հնարավորություններ են բաց թողել, քանի որ սեփական կարողությունները գերագնահատելու միտում ունեն։ Հուսով եմ՝ այս անգամ նրանք այդպես չեն վարվի»,- ասել է Գարգաշը։